Online Reporter
YASVIKA nguva iya yezororo rakareba rekupera kwegore iro rinenge rakatarisirwa neveruzhinji sezvo vakawanda vachiwana mukana wekumbozorora kuenda kumabasa pamwechete nekuwana mukana wekufara nehama neshamwari.
Panguva yakadai, vamwe vanofamba nzendo dzinosanganisira kuenda kumusha kana dzimwe nzvimbo dzemafaro zvinove zvinorumbidzwa zvakanyanya.
Vamwe vanenge vachiita mabiko, vachidya nekunwa zvekuti panenge pasingadanwe anonzwa.
Asi zvakakosha kuti veruzhinji vasafarise panguva iyi nekuti vakuru vanoti kangoma kana koririsa kanenge koda kuparuka.
Kune vamwe vanogona kuzopedzisira vave mutirongo nekuda kwekufarisa nekudaro zvakakosha kuti munhu ati fare-fare tindike.
Veruzhinji vanofanirwa zvekare kuyeuka kuti zvikoro zvichange zvichivhurwa munaNdira gore rinotevera saka hazvina hungwaru kupedzera mari yose kumafaro uye vana vozoshaya mari yefizi nezvimwe zvinodiwa kuchikoro.
Panguva yezororo yakadai, makore ose ndipo zvekare panoitika tsaona dzakawanda dzemumigwagwa nekuda kwekuti huwandu hwevanhu vanenge vachifamba nzendo dzakasiyana-siyana hunowedzarawo.
Izvi zvinoreva kuti vose vanoshandisa migwagwa, kubvira kuvatyairi vedzimotokari kusvika kune vanofamba netsoka, vanofanirwa kutevedza mitemo yemumigwagwa nechinangwa chekudzivirira tsaona.
Hongu, nguva yezororo rakadai ndeyekufara asi zvakakosha kuti vatyairi vangwarire zvikuru kana vari pamugwagwa kuitira kuchengetedza hupenyu hwavo pamwechete nehwevari pedyo navo.
Zvinorwadza kuona vanhu vachirasikirwa nehupenyu nekuda kwetsaona dzemumigwagwa dzinokwanisa kudzivirirwa.
Semuenzaniso, gore rapera, vanhu 127 vakafa uye vamwe 489 vakakuvara mutsaona dzemumigwagwa dzinosvika 2 000 dzakatika panguva yezororo reKisimusi.
Panguva imwechete pakati paZvita 15 muna2021 kusvika Ndira 5 2022, vanhu 102 vakafa zvekare apo vamwe 478 vakakuvara mutsaona dzinosvika 1 914.
Kureva kuti huwandu hwevanhu vakafa nevakakuvara mutsaona dzemumigwagwa panguva yezororo reKisimusi gore rapera hwakawedzera kana zvichienzaniswa nemuna2021.
Zhinji dzetsaona dzakaitika idzi dzaive dzemotokari duku kana zvichienzaniswa nemabhazi.
Parizvino mvura iri kunaya kumativi mana enyika zvinoreva kuti vatyairi vanofanirwa kungwarira sezvo izvi zvinoita kuti dzimwe nguva vatadze kuona zvakanaka zviri mberi kwavo uye migwagwa inogona kunge ichitsvedza.
Kune vamwe vanoda kutyaira vakadhakwa kanove katsika kakaipa sezvo izvi zvichikonzeresa tsaona.
Zvakakoshawo kuti mutyairi aone kuti motokari kana bhazi rake rakakodzera kuve pamugwagwa kwete kuda kumirira kuzorondwa nemapurisa kana vamwe vabati vezvemutemo.
Tinokushuvirai Kisimusi negore idzva zvizere nemufaro nemaropafadzo.
