Online Reporter
Abel Ndooka
MUTAMBI wenhabvu wechidiki – Adam Mukwasi – anoti anoshuvira kutevera matsimba akaputeni wemaWarriors, Marvelous Nakamba, nekuzotambirawo chikwata cheAston Villa chekuEngland.
Mukwasi akahwina mubairo mukuru wePlayer of the Tournament kumutambo weMaster H Birthday Tournament uyo wakatambirwa kuMbare masvondo adarika.
Mutambo uyu waive wekupemberera zuva rekuzvarwa kwemuimbi ane mukurumbira Master H. Wakahwiniwa nechikwata cheReal Stars icho chakakunda cheAll Stars 1-0 mufainari yemutambo uyu.
Achitaura neKwayedza, Mukwasi, uyo ane makore 17 ekuberekwa, anoti shuviro yake anodawo kuzosvika pakasvika naNakamba nekutambira zvikwata zvikuru zvenhabvu zvekuEurope.
“Zvinhu zvinofadza zvikuru kusarudzwa kuti wadadisa watamba nhabvu kudarika vamwe vese apo panenge pane mutambo une zvikwata zvakawanda.
“Ini semutambi wechidiki, ndinoshuvira kusvika pakasvikwa naNakamba uyo anotambira nhabvu yake kuEngland.
“Ndinoda kunotambira nhabvu yangu kuEngland kuzvikwata zvinosanganisira Aston Villa iyo yakatambirwa naNakamba.
“Ikoko kuEurope ndinoyemura vatambi vanosanganisira Toni Kroos uyo achangobva kusendeka shangu dzake dzenhabvu naLuka Modric anotambira Real Madrid nenyika yeCroatia,” anodaro Mukwasi.
Anoti kuti nhabvu yevechidiki isimukire, iye nevamwe vezera rake vanofanirwa kurongerwa mitambo yakawanda yezvikwata zvemuno nezvekunze.
“Sevechidiki kuti nhabvu yedu iende kure, masangano akasiyana anofanirwa kudira mari kuti zvitibatsire mutambo wedu uende mberi.
“Hakuna chinotitadzisa kuti nhabvu yedu igosvika padanho repane yedzimwe nyika naizvozvo kana pakadirwa mari tinotosvika chete,” anodaro Mukwasi.
