mbulelo smpofu
Innocent Kurira
OFUNA ukuba ngumongameli weZifa uTemba Mliswa usecele amakhansila omdlalo wenguqu ukuthi aqakathekise izifiso zelizwe, batshiyane lomkhuba “wokuthengisa”.
UMliswa ukhulume lokhu esethula imibono yakhe phambili kokhetho oluzakuba khona ngoZibandlela ngomnyaka ozayo.
UMliswa, uzancintisana loWalter Magaya, Nqobile Magwizi, Twine Phiri, Farai Jere, Martin Kweza, Philemon Machana loMarshal Gore.
Kuliviki uMliswa ungene enkundleni zokuxhumana, wacela ukuthi kuqhutshwe ukhetho olungasoke ludale inkulumo embi lobungilimbane.
“Indlela obekuqhutshwa ngayo inhlelo zenguqu sekuvele ukuthi kazisebenzi. Sekuyisikhathi sokuthi sihlele kakutsha ukuze silethe ingqubekela phambili.
“Ngiyazethemba ukuthi ngizaletha ubukhokheli bohlonzi, ngibuyisele inguqu yakithi ebuhleni,” kutsho uMliswa.
Ucebise amakhansila enguqu azavota ukuthi aqakathekise izifiso zelizwe.
“Ingqobe ikumakhansila eZifa. Kumele afake ilizwe phambili, ahlose okuhle, avote elengqondo ezijulileyo. Lokhu kuzenza kube lula ukuthi kukhethwe inkokheli zoqobo. Kumele batshiyane lokugijimisa imali abaziphiwa ngudlu yilabo abafuna ukuvotelwa. Umlandu ukubo.
“Ibhola lethu lidinga ukuhlanzwa. Lidinga imvuselelo njalo kumele kube lenkokheli ezaletha inguquko. Lesi yisikhathi senguquko.
“Kungxoxo yami lamakhansila eZifa, kube lombono ofanayo ukuthi okwamanje izinto zonakele ngakho kudinga inguquko. Ubuhle kulokho yikuthi yibo abalamandla wokuletha inguquko le. Umlandu wabo uyacaca.”
Imibono kaMliswa ize ngesikhathi iqula leZifa Electoral Committee likhangelelwe ukuthi lethule amabizo azancintisa kukhetho olugoqela isikhundla sikamongameli, abasekeli bakamongameli lequla lebhodi. Isimemezelo lesi sikhangelelwe mhlaka 23 Mpalakazi.
Incwadi zokhetho ezilethwe yilabo abafuna izikhundla zethulwa ngeviki edluleyo.
Lo ofuna ukuba ngumongameli weZifa, kumele abelesithupha se-Ordinary Level, epase izifundo ezinhlanu njalo engaphezulu kweminyaka engu-40 yokuzalwa. Kumele abehlale kuleli okweminyaka emibili edluleyo.
Kulabantu abangu-40 abafuna ukuvotelwa ukungena kuqula lebhodi njalo bagoqela osaziwayo emdlalweni uFrancis Zimunya, unobhala weChicken Inn uTavengwa Hara, owayeyisikhulumi seZifa uXolisani Gwesela, owayengumaneja wama-Warriors uShariff Musa and lo-Andrew Tapela owake waba ngumgcinisihlalo weZifa emhlubulweni ongezansi yelizwe.
Abanye abafuna izikhundla nguSweeny Mushonga, Admore Chivero, Morgen Dube, former Harare deputy mayor Kudzai Kadzombe, Desmond Ali, Tizirayi Luphahla, Nicholas Munyonga, Cuthbert Chitima, Alois Bunjira, Masimba Chihowa, Sibekiwe Ndlovu, Cecilia Gambi, Makwinji Soma-Phiri, Chris Mutungwazi, Harlington Shereni loBlessing Mpande.
