‘Gcinani kuhle ama-broiler’

Bhekimpilo Tshalibe 

ABAFUYI benkukhu zohlobo lwama-broiler kumele bakhuthalele ukuzigcina zikusimo esihle nxa befuna ukuthola inzuzo engcono, kutsho ingcitshi zokufuya kunhlanganiso ye-Agritex.

UNkosazana Sandra Ndlovu ongu-Agricultural Extension Officer koBulawayo ukhuthaze abalimi ukuthi befuye inkukhu lezi ngendlela ezabancedisa ukuthi lapho nxa bezithengisa, benelise ukuthola inzuzo ephezulu.

Uthe ukufuya inkukhu kakuhluphi njalo ukhuthaza abalimi ukuthi beziyakhele izilugu.

“Sikhuthaza abalimi ukuthi bakhele inkukhu zabo izilugu ezilemiduli emfitshane besebefaka ucingo phezulu kwaleyo miduli ukwenzela ukuthi kube kungena umoya. Okunye njalo sikhuthaza abalimi ukuthi bebone ukuthi phakathi kwezilugu kuhlala kuhlanzekile,” kutsho uNkszn Ndlovu.

Uqhubekele phambili wathi inkukhu kazifuni kuhlaliswa lapho okumanzi khona.

“Sikhuthaza abalimi ukuthi bendlalele inkukhu zabo ngotshani phansi njalo bebone ukuthi lapho abazihlalisa khona komile ngaso sonke isikhathi. Utshani lobu obuyendlalelwa inkukhu kumele butshintshwe njalonje. Okunye sikhuthaza abalimi ukuthi befakele inkukhu zabo isibane okwamahola angu-23 ngelanga. Lapho okuhlala khona inkukhu kumele kube isilinganiso sokutshisa sibephathi kwe-15-27 Celsius.”

Uthe abalimi kumele bethengele inkukhu zabo ukudla, bengazincitshi.

“Sikhuthaza abalimi ukuthi bethengele inkukhu zabo ukudla ngoba ama-broiler ayadla. Abalimi kabalandele izixwayiso abazithola ezitolo lapho abathenga khona ukudla. Kabathenge ukudla okugoqela ama-starter, grower lama-finisher feeds. Okunye njalo sikhuthaza abalimi ukuthi bezinike lamanzi ahlanzekileyo izikhathi zonke,” kutsho uNkszn Ndlovu.

Uthe inkukhu zama-broiler zidinga ukuhlatshwa amajekiseni azivikela emikhuhlaneni.

“Sikhuthaza abalimi ukuthi behlabe inkukhu zabo ukuze zivikeleke emikhuhlaneni ejayele ukuzihlasela.”