mbulelo smpofu
Yisimaye maye ilizwe lonke. Bayakhala abazali. Bayakhala ababalisi. Bayakhala abaphathi bezikolo. Bayakhala abameli bezemfundo. Sebeloywe yini abafundi bakulezi izinsuku? Sebedle mazambane bani atshiywa liwabayi sebengumhlambi kazalusile nje. Sebekuthethe ngaphi konke lokhu asebekwenza phambi komphakathi Batayi? Emadolobheni amakhulu lamancane sekubhubhe isizwe.
Nxa singelakho ukulimuka sizokhala zome. Emaphandleni lakho usukhona umthonselanyana wokungezwa. Abafundi sebebonakala ngezenzo ezidabukisa inhliziyo. Ntombazana, jaha konke sekufanana ngoba bonke sekungathi bagqiziswe amahlwayi obungezwa. Esikubonayo ezilindweni zamabhasi kubonwa nguZulu wonke na? Esihlangana lakho kuvelela kuwuphi umkhono na? Kambe laba bafundi bahlala lathi emakhaya na?
Buka imvunulo yamajaha la avela esikolo lesi esilemvunule le. Usethethe konke akwaliswayo endlini ukuba akugqoke weza lakho lapha kumphakathi. Uyazi ukuba uzakhuzwa ephulele izikhuni endlebeni. Banengi abangane lapha. Abanye ngabezinye izikolo. Sekuntshintshenwe imvunulo yeka. Ungabe usamqamba owakulesiya isikolo. Ozambona ngomazi emqonda.
Kuqilwa bani? Kuqilwa mzali, mbalisi kanye lomphakathi. Kambe zingene yini izifundo nxa thina bafundi siziqhatshele imisebenzi yasezilindweni zamabhasi? Bantwabethu asiyekeleni ukuziyenga.
Ukuvunula lokhu okwamacici ebafaneni, kanye lezingwane zomqando phezu kwemvunulo yesikolo kuyenyanyeka. Konke okungelamvumo yikho abanye abafundi abagijima bakugqoke emini bekuvumbulula kuzikhwanyana zabo abayabe befihle kuzo. Bakuvunula ukuze bazizwe bengabantu uqobo kanti qha bayaziyenga. Nanka lamantombazana ami phakathi kwexuku lamajaha. Yizo lezongxoxo ezilentambo , azipheli.
Bayaqhubeka abafundi ngokungaziphathi kuhle. Abanye babo ngababonakala sekulwiwa. Asithandabuzi ukuba izikhwili ezibangwayo ngezamantombazana.
Pho kuxotshwe mpala mbili? Hatshi bafundi. Asisebenzeni udaba lokufunda kusavuma funa sikhe phansi umganu ukhona.
Nansi imibuzo :-
1. Abafundi laba balezimilo ezinjani? Sekela impendulo yakho.
2. Umphakathi, abazali lezihlobo bangaphathisa njani abantwana baloluhlobo?
3 Izikolo zona zingenza macebo bani ukukhupha abafundi kuloluhlupho?
4. Abafundi bona bezwa njani ngabanye babo abaziphatha butshapha kangaka?
Asihlanganeni kwelizayo bafundi.
