mbulelo smpofu
Ugwalo Emfuleni Wezinyembezi olwalotshwa nguEzekiel S.K Mkhize
Ngeviki edlulileyo sitshiye intombazana engu Sinqobilizwe iphakathi kokudideka komqondo. Yisikhathi lapho ayemukwe khona ubuntombi bakhe buphelele.Ikhaba lonke ayelelusile ngesineke kanye langenhlonipho laselidlithizwe yisilo sasuka nje sangena igusu kwangabi ndaba zalutho. Ubuhlungu, ukuhlukumezeka abantu besifazana ababe hlangana lakho ngesikhathi sempi akubaliseki, abanengi basala begodle amanxeba angelakuphola angelaphekiyo.Ngaleso sikhathi kwakubongwa impilo qha kungakhathalekile nhlobo.
KomaNyathi lakhona batshaywa badutshuzwa okwenyamazana kuthiwa kabachaze lapho uSehlulizitha acatshe khona. Amakhosikazi amabili la akukho ayengakwenza ngaphandle kokuthi bongane bona bodwa, uMaNyathi nguye owayesenelisa ukuma ngakho wayesonga umaMoyo owayekhulelwa zinhlungu. Kulapha esifunda khona ngokuqakatheka kothando lwabomakhelwane. Lapho bezwanana njalo bebona ngaso linye bayanakekelana bagcinane okuyinto eqakathekileyo empilweni kanye lase kuhlaleni kwabantu ezigabeni jikelele nje,kungahlaliswana ngokuthula phakathi kukamaMoyo lomaNyathi kambe wayezathotshwa ngubani amanxeba lezinyalo zokudutshuzwa.
Udaba lwempi lwaseluyingxoxo esegudwini, abantu bonke babehlangana ngulowo esiza lezakhe ayezizwile. Iwayilesi ibidlala indima enkulu kakhulu ngalesi sikhathi sempi yikho lapho abantu ababesizwa khona ngokuqhubeka kwempi lenhlelo zonke nje jikelele ngokwakusenzakala emhlabeni wonke.Lokhu ke kwakubasiza ngokuthi labo bahlale bekhangelele okuthile njengoba nje bona babefisa ukuthi impi ngabe iyaphela kodwa indaba ezazibuya zazibika ukuthi amazwe amakhulu ayengakasuthiseki njalo eyiphehla impi hatshi okokudlala. Amaphephandaba lawo ayesekhona ekugijimiseni izindaba loba amadoda athile ayewabuka ngamehlo kungazwakali lutho lokhu kusivezela ukuthi ngesikhathi lesi abanengi babengakajuli kakhulu emfundweni ikakhulu abadala loba nje basebezama ngamandla wonke ukuthi abantwana babo baye funda ezikolo kwasuka nje kwaphambanisa yona impi le, yamisa konke okuqondane lempumela yabasakhulayo.
Phakathi kokudideka komqondo uMaMoyo esathi yebo kambe usekubonile okomhlaba kuthutsha indodana yakhe asewayidela lokuyidela. Impilo yaqhubeka kungasela busuku kungasela mini, igazi lichitheka imizuzu yonke. Abathengisi basebeyazi beyiqonda ingoma yabo, ontanga labo babeyazi beyiqonda eyabo ingoma, iBazooka yilo elalibusa.
