mbulelo smpofu
Thokozile Mbedzi
ZlLOKHE zitshwaqe imizimba izakhamizi zesigabeni seSection 8 eTriangle ngemva kokuba enye indoda igwazwe ngomkhonto yafa ngoLwesibili ngeviki ephelileyo.
Kubikwa uEdmore Mavesere oleminyaka engu-38 wesigabeni seSection 15 eTriangle ugwazwe ngomkhonto wafa ngamasela ayetshontsha umumbu ensimini.
UMavesere wayehambe emasimini ukuyathelela lomngane wakhe, bafica labanye omakhelwane bakhe, ngezikhathi zantambama.
Amasela angena emasimini engananzelelanga ukuthi abantu basesekhona, ebelethe amasaka emuva.
Umngane kaEdmore wasememeza ngesikhathi ebona amasela la amane, amabili ayehlome ngemikhonto.
Amasela la esebone ukuba asebonakele ahle abaleka eqonda kuEdmore.
Esazama ukuba abaleke asenanzelela ukuba omunye wabo useza banjwa nguEdmore, omunye wabo wamsusela amanqe wamgwaza ngomkhonto esifubeni, eceleni lesandla senxele waphinda wawukhupha wabaleka lawo.
UEdmore wahle wancediswa ngumngane labomakhelwane ukuze aye esibhedlela eCollins Saunders Hospital Triangle lapho ahamba mhlaka 25 Lwezi wafa mhlaka 9 Mpalakazi.
Isikhulumi samapholisa esabelweni seMasvingo, uAssistant Inspector Patinyu Masawuso uthe kulicala ukuthwala izikhali esithi,
“Kulicala elikhulu kakhulu ukuhamba umuntu ethwele izikhali eziyingozi.
“Amapholisa acela uzulu ukuba ongabe elolwazi lalapho okungaba lezigilamkhuba lezi azise amapholisa aseduzane ukuze bafinyelelwe yingalo yomthetho,” kuphetha Asst Insp Masawuso.
