Umqanso onzima kuZPC Hwange…izadlala na kuPSL?

Nkosilathi Sibanda
IQEMBU leZPC Hwange linqobe kusicoco seZifa Regions Champion of Champions ngokunqoba iTriangle nge 2 ka 1 enkundleni yeBata eGweru ngempelaviki.
Loba litshayelwa ihlombe ngokuthwala inkezo le, zithe kulokungahlaliseki eqenjini ngokungena kwabo kuligi ephakemeyo, iPremier Soccer League (PSL).

Ukungahlaliseki lokhu kubikwa kuvela ekuthini inkokheli zeqembu kazikatholi isiqiniseko esivela kubaphathi benkampani esekela iqembu, iZimbabwe Power Company nanko kulelinye iqembu elingaphansi kwalinkampani elikuPSL, iZPC Kariba.
Iphephandaba likazulu lithole udletshana lokuthi iziphathamandla zenkampani yamagetsi le, zitshaywa ngamakhanda ngoba kungelula ukuthola imali yokuphatha amaqembu amabili kuligi ephakemeyo kuleli.
Amahemuhemu la asememetheke emphakathini enguqu edolobheni lamalahle njalo labafakazi abaqotho baloludaba baveze ukuthi iqembu libhekane lomqanso.

“Akukho lula emahofisini eqembu. Okusinda iziphathamandla yikuthi akucaci ukuthi bazaphiwa na imvumo yokudlala kuPSL njengoba kulensolo yokuswekala kosekelo lwemali. Inkinga yikuba lamaqembu amabili kuPSL,” kutsho omunye wabalandeli beZPC Hwange, owale ukuthi aqanjwe.
Kodwa, eqenjini kulokhe kulenjabulo kulandela ukunqoba isicoco sikaDivision One emhlubulweni ongezansi yelizwe.
Umgcinisihlalo weZPC Hwange uFarai Mahachi ulandule wonke amahemuhemu, wathi bakulindele ngabomvu ukungena enkundleni zePSL.

“Sadlala, sancintisa saba zintshantshu. Sizalungiselela njalo ukuthi senze okufanayo kuPSL. Esigxile ngakho kakhulu yikusebenzelana lomphakathi kunye lokuletha abantu abatsha, abalethalenta abavela eHwange.
“Lokhu kuhambisana lombono wenkampani yethu. Inhloso yethu yikusungula ithimba labadlali abaxhumene ngokujulileyo lomphakathi njalo kubeliqembu elizimisele ukuphakamisa impilo yabadlali,” kutsho uMahachi.

IZPC Hwange iqeqetshwa nguMebelo Njekwa encediswa nguMthandazo Nkala loBrighton Siziba. Abanye abaqeqetshi nguBrighton Kekala owabonozinti loBonamali Bwanali oqeqetsha ukuqina umzimba.
Iqembu leZPC Hwange liqale ngokuphangisa emdlalweni lo, njengoba uJohn Chinyerere ephule ukuthula enkundleni ngemva kwemizuzu emibili umdlalo uqalile. I-Triangle ibuye ngesivuvu, yahlohla ibhola ngombekwa, kukhabe uMenford Mudzimu.

IZPC Hwange ayizange ikhangele emuva, nanko umdlali wayo uDingani Maphosa uhlohle elinye ibhola ngomzuzu wamatshumi amabili. Ngesigaba sesibili somdlalo, iTriangle ihlasele kanengi kodwa iZPC Hwange ibambelele ngokuzethemba.
Kusenjalo, endleleni yokuya ku-final yeChampion of Champions, iZPC Hwange iqethule amaqembu abalisa iScottland ngokunqoba 5-4 kumbekwa. Zaziqede umdlalo kuyi1-1, andubana zimelane ngombekwa. ITriangle ifike emdlalweni wokucina ngemva kokunqoba iKwekwe United 5-3 kusigaba sembekwa. Kumdlalo wokudinga imendulo yethusi, iKwekwe United itshaye iScottland nge 3-1.
Umqeqetshi weZPC Hwange uMabelo Njekwa ujabule kakhulu ngokunqoba.

“Ngicabanga ukuthi besiqinile kulamanye amaqembu esidlale lawo. Sibe lokubekezela njalo lokhu sikusebenzise ngendlela esincedileyo. Siyajabula ngokunqoba lumqhudelwano,” kutsho uNjekwa.
Umqeqetshi weqembu leTriangle uLuke Masomere uthe lumncintiswano ube muhle njengoba iqembu lakhe lizaphatheka kuPremier Soccer League ngomnyaka ozayo.
“Besikufuna ngempela ukunqoba kodwa sehluleka ukuguqula amathuba ethu,” kutsho uMasomere.
I-Champion of Champions ngumqhudelwano oqoqwe yiziqinti ezine zeZifa, uqoqwe yiZifa Central Region.