mbulelo smpofu
Shingai Dhlamini
IBULAWAYO Galaxy izangqikilana lamanye amaqembu ayisikhombisa emqhudelwaneni weMotty Foundation Soccer Tournament enkundleni yesikolo se-St Bernard’s High School mhlaka 14 Mpalakazi.
IGalaxy yiyo intshantshu kumncintiswano owaqhutshwa ngenyanga kaMpandula.
Amaqembu azaphatheka kulumncintiswano abalisa iBulawayo Galaxy, Rea Vaya Royals, Streetset, Dube Strikers, Sibanye Academy, Apollo Academy, Loxion Venoms kunye leFuture Legends.
Umqhudelwano lo uqoqwa nguDanny Ndlovu, umqeqetshi wenguqu kwabesifazane. UNdlovu, ekhuluma leZimpapers Sports Hub uthe kuzancintisa amaqembu ayisitshiya galombili.
“Silamaqembu ayisitshiya galombili kodwa ngoMpandula kwakulayisithupha, okutsho ukuba umncintiswano wethu uyakhula.
Uthe umqhudelwano lo wenzelwe ukuthi amantombazana aveze ithalenta lawo enkundleni yebhola aphinde abe lendlela yokuthi ahlangane, axhumane, abelane amacebo okuphumelela empilweni.
“Njengenhlanganiso, inhloso yethu yikwakha inkundla ukuze amantombazana athole amathuba njalo afunde okunengi ngempilo njengoba edlala umdlalo awuthandayo,” kutsho uNdlovu.
UWatson Phiri, umqeqetshi weBulawayo Galaxy uthe balungiselele ngokupheleleyo njalo bafuna ukuphinda umphehlo, bayithwale inkezo.
“Siyilungiselele inkezo. Kumncintiswano odluleyo sasingene siliqembu elincinyane kodwa senelisa ukunqoba ngoba sadlala ngokubambana.
“Abadlali balwela, bayimela indaba yabo. Ngakho-ke, lasemidlalweni elandelayo, sizangena enkundleni sihlose ukuthi sinqobe.”
