mbulelo smpofu
Ugwalo lulotshwe nguTommy Matshakayile Ndlovu lo Doris Nomathemba Ndlovu belo Bekithemba Sodindwa Ncube
Ugwalo ludindwe yiMambo Press
Ukufa, Ukungcwatshwa lokuzila
Kunsuku ezedluleyo besixoxa ngokufa komninimuzi. Lamuhla siqala udaba lwethu nxa kufe umfazi. Ukuze uzwisise udaba lolu bala okuxoxwe ngakho kunsuku ezedluleyo. Nxa kufe umfazi, indoda yona yayizila kanje: Ezandleni lenyaweni yayigqiza intambo ezelukwe ngemizi.
Ekhanda lapha yayibopha ngozwezwe lwesikhumba esingelaboya. Layo kwakumele izile ukuhlangana lowesifazana okwesikhathi eside, ibisibagezisa abanye abafazi bayo layo izigezise.
Ngemva kwalokho yayibakhunga ngezipho ezifana labo nkukhu kumbe ombuzi. Ngemva kwalokhu-ke indoda yayisilungele ukungena ezindlini zabafazi bayo laba. Loba indoda yayizila kanje okwayo abantu babengakuqapheli kakhulu okunjengokomfazi.
Kweminye imizi abantu bonke abalapha ekhaya okufiwe khona babegelwa inwele zonke ngemva kokungcwatshwa komufi.
Konke lokhu sekwenziwe kwasekuzaqoqwa zonke impahla zomufi zifakwe kwenye indlu lapho ezazizahlala khona zizezilungiswe ngemva kombuyiso. Nxa kungubaba ofileyo, lezifuyo lapha ekhaya inkomo phela, zazingathengiswa umbuyiso ungakenziwa.
Ngelanga lesibili ngemva komngcwabo kwakudingwa inyanga ichele abantu balapha ekhaya ibagezise umnyama. Ngemva kwalokho basebezakudla inkubalo.
Inkubalo yinyama edliwa ihlanganiswe lomuthi othile. Inkubalo yinyama edliwa nxa kufiwe kulandelwa eminye imikhutshanyana. Qaphela kodwa ukuthi inkubalo lengovu kasiyonto yinye.
Injongo yokudla inkubalo ngeyokuthi izihlobo zomufi zidele ukuthi ngempela leso sihlobo sazo kazisoze zisibone futhi.
Umuthi lo udliwa utshiyelwana kuthi labo abayabe bengekho mhlalokho bathi mhla befika beze esililweni bafike bayiphiwe inkubalo labo badelise inhliziyo zabo.
Ukuze inkubalo igcinwe okwesikhathi eside yayisonyiswa ibe isibekwa yonyisiwe. Yayingagcinwa kuze kuphele umnyaka.
Phela esiNtwini umuntu ulakho ukuyakhalela abantu loba sekuphele isikhathi eside kangako. Ukubikwa kwemfa lokukhalelana: EsiNtwini nxa kungafiwa kuthunywa umuntu oseqotshwana, oleminyaka engaphezulu kwetshumi lesithupha ukuthi ayebika ezihlotsheni. Ufika athi: “Kuthiwa ngizelitshela ukuthi uZibani (eqamba ibizo lalowo muntu) kasekho.”
Abayabe bengenelisanga ukuyafika mhla engcwatshwa lowo mufi bazakuya sekungezinye insuku besiya khalela labo abafelweyo.
Kulokulila (ukukhala) phela kuleyo ndawo. Nxa umuntu esiyakhalela abantu abafelweyo kuthiwa uya esililweni. Umuntu oya esililweni ngomkhuba wesiNtu kumele avukele khona ekuseni kakhulu afike khona ilanga lingakakhweli. Umuntu oza esililweni ufika akhuleke kodwa angaze alindela ukuvunyelwa, uhle aqonde khonapho abona kulabantu khona.
