Sinokubonga Nkala
Ethel Ncube
INDUNA yeBinga uDobola iseveze ukuba wonke umzali olobolisa umntwana oleminyaka engaphansi kwe-18 esigabeni sayo uzabotshiswa.
Induna uDobola iveze ukuba izasebenzisa lelinyathelo ngenhloso yokwehlisa amacala okwendiswa kwabantwana bebancane.
Ekhuluma lentatheli uveze ukuba ufisa wonke umntwana afunde aqede isikolo hatshi ukwendiswa.
“Bazali abantwana abangamankazana ngabantwana kabazalelwanga ukwenza ibhizimusi lokulobolisa ukuze umzali adle. Fundisa umntwana afunde aqede asebenze ayekwenda nxa isikhathi sesifikile hatshi ukutshiyisa umntwana isikolo.
“Njengenduna ngingezwa kuphela ukuba kulomzali olobolise umntwana omncane ngiqonda emapholiseni abazali babotshwe. Ngizimisele kulokho njalo indaba yakhona ngizabe ngizayilandelela emapholiseni abazali baze babotshwe ukuze abanye babone ukuba ngumkhuba ongayisiwo owokwendisa abantwana bebancane,” kubika induna uDobola.
Ubuye waveza ukuba ekulwisaneni lokwendiswa kwabantwana bebancane kukhona asebenzisana labo.
“Indawo yami inkulu njalo ngezigaba bakhona abantu abayabe belilihlo lami bengezwa kuphela ukuba kulomzali osesendisa umntwana emncane sihle nje udaba siyebika emapholiseni. Umntwana ovunyelwa ukwenda ngoleminyaka engu-18 kusiyaphezulu lokhu okokuthi umntwana wenda ekugiredi 6 kumbe 7 kuzaphela. Abantwabethu kumele bafunde bangagijinyiselwa ukwenda bengabantwana okucina kudala uhlupho ekucineni,” kuphetha induna uDobola.
mbulelo smpofu
