Sinokubonga Nkala
Bhekimpilo Tshalibe
ZILOKHE zitshwaqekile izakhamizi zeWest Somerton koBulawayo ngemva kokuba enye indoda ixabane leloja kubangwa ukuthi umdlwane ulale kuveranda okuyinto iloja akade lisala ukuthi yenzakale.
Kubikwa mhlaka 1 Mpalakazi kuwonalo umnyaka ngezikhathi zehola lesikhombisa ntambama, uMasimba Nigel Chitekedza (30) waxabana leloja lakhe emzini wakhe ngoba yena wayesithi umdlwane wakhe kumele ulale kuveranda kodwa iloja lisala. Kubikwa ukuthi ngemva kokuxabana lokhu uChitekedza wasuka lapho waya komakhelwane wayamtshela ngendaba yokuxabana kwakhe leloja umakhelwane wakhe wasesithi uzakhuluma leloja ngelilandelayo njengoba kwasekusebusuku.
Kubikwa uChitekedza wathi eqeda kuxabana leloja walibikela ukuthi usesiyazibophela. Kuzwakale ukuthi iloja alizange lizihluphe ngokumlandela njengoba lalizitshela ukuthi uyazidlalela kodwa labikela umalume kaChitekedza ngalokhu okwakwenzakele.
Ngelanga elifanayo ngo-2100hrs umngane kaChitekedza wanakana ukuyamvakatshela wamthola elenga esihlahleni. Umzimba kamuyi wathwalelwa eUnited Bulawayo Hospitals ukuze uyehlolwa.
Intatheli ikhulume lesikhulumi samapholisa uAssistant Inspector Nomalanga Msebele othe udaba olunje lusezandleni zabo.
“Sithanda ukukhuthaza abantu ukuthi bananzelele nxa umuntu esethusela ngokuzibulala ngoba kwezinye izikhathi angacina ekwenzile. Umakhelwane ngabe walalela umngane wakhe wamlandela waxoxisana laye mhlawumbe ngabe lamuhla uyaphila.
Thina njengamapholisa sileCommunity Relations Liason Office ebona ngezokukhumisana umlotha kukazulu kuzo zonke inkamba zethu njalo sikhuthaza abantu ukuthi bezokhuluma lathi bekele ukuxazulula izindaba bebodwa,” kuphetha uAsst Insp Msebele.
mbulelo smpofu
