mbulelo smpofu
YiNtatheli kaMthunywa
OWAYENGUMDLALI weqembu lesizwe seZimbabwe, uJohannes Ngodzo, uthe umqhudelwano wakhe wesibili webhola lenyawo, uzaqhutshwa ekupheleni kwalinyanga.
Umqhudelwano lo, olindwe ngamehlo abomvu, uhlose ukuphakamisa ithalenta kubadlali abasakhulayo lokuthuthukisa inguqu emphakithini.
Ngomnyaka odluleyo amaqembu amane aphatheka kulumncintiswano, abalisa i-Ali Baba Football Foundation Academy, Mzilikazi, Entumbane Stars leReal Stars. Lonyaka amaqembu azadlala enkundleni yeMakokoba njalo abaqoqi bomncintiswano bazabika inani lamaqembu azancintisa ngokuya kwesikhathi. Ekhuluma leZimpapers Sports Hub, uNgodzo uthe ukhangelele ukuthi abemanengi amaqembu lokuthi kunxuswe labosaziwayo benguqu abazasekela abadlali abasakhulayo.
“Ngiyajabula kakhulu ukubika ngamalungiselelo omqhudelwano wami wesibili, ohlose ukuphakamisa inguqu kwabasakhulayo emalokitshini. Njengomuntu owaba lenhlanhla yokuba ngumdlali owaphiwa amathuba amahle kunguqu, ngikholwa ukuthi kubalulekile ukubuyisela lokhu engakutholayo emphakathini lokuncedisa ukuvulela abantwabethu amathuba emdlalweni. Ngokwenza njalo siyabe siguqula impilo isiba ngcono,” kutsho uNgodzo.
Uthe kunengi okuzatholwa ngabadlali ngaphandle kokuncintisa kuphela.
“Lo umqhudelwano uphezulu nje kokuncintisana. Uyinkundla yabadlali abasakhulayo okhona ukuze bathole ulwazi olubalulekileyo, bafunde emaphutheni abo, bathuthukise uthando lwabo lomdlalo.
“Ngiyaziqhenya ngokwenelisa ukunikeza leli thuba, njalo ngikhangelele ekuboneni ithalenta elikhona. Ngithanda ukudlulisa ukubonga kumaqembu wonke, abaqeqetshi, kunye labazali abasekele loluhlelo. Sisonke, kasisebenzeleni ukuthuthukisa ingcitshi zakusasa zebhola leZimbabwe.”
UNgodzo, owayengumdlali wasesiswini wamaWarriors, waduma kuqembu leHighlanders ekuqaleni kweminyaka yama-2000, wakhethwa kuqembu lesizwe njalo kwakungaleyo minyaka lapho athola imiklomelo emdlalweni.
Waphiwa isicoco sokuba yiPlayer of the Year eleminyaka elitshumi lanhlanu (15) ekuqembu leHighlanders eladlala isizini yonke lingazange lizwe ukunqotshwa ngesizini ka1995. Babeqeqetshwa ngu-Ali Baba Dube ohlonitshwa ngokulolonga ithalenta elihle koBulawayo.
UNgodzo wathola izicoco ezinengi ngesikhathi edlala, okuhlanganisa ukukhethwa njengomdlali wesibili owenza ngcono kulabanye kuma-Soccer Star of the Year, Highlanders Player of the Year, Grizzlers Sizzlers Player of the Month, kunye lezicoco ezimbalwa zeligi eleHighlanders.
Impilo kaNgodzo yaguquka mhlaka 5 Ntulikazi 2003 ngesikhathi amaWarriors edlala umdlalo wokuyangena kumncintiswano we-Africa Cup of Nations (Afcon) bedlala le-Eritrea, lapho alimala khona enyaweni, wehluleka ukuqhubeka ngokudlala.
UNgodzo uthe akaphindanga wasila ngemva kokulimala.
Okwakhathesi ungumqeqetshi omkhulu weqembu le-Adachi FC.
