mbulelo smpofu
Ethel Ncube
UMHLABELELI kaMaskandi uZinjaziyamluma ubevakatshele isikolo seTsholotsho lapho afike wafundisa ngezidakamizwa kanye lamathalenta wapha lezizoco kwabenze kuhle.
Umcimbi lo wenziwe ngoLweSihlanu lweviki ephelileyo esikolo seDinyane High School lapho obekulezikolo ezibalisa iMalanda Secondary, Bhubhude Secondary School leMagama High School.
Ekhuluma lentatheli uZinjaziyamluma ubike ukuba ubevakatshele esikolo seDinyane.
“Bengisesikolo seDinyane kulomdlalo we-tournament okuthiwa Ziyamluma and Dumi Soccer Tournament ikanti bengilande ukuyafundisa abafundi ukuba badlalele khatshana kwezidakamizwa.
Ngibachazele ukuba izidakamizwa azilalo ikusasa kodwa ziyalimaza umuntu acine engasafundi kuhle esikolweni,” kubika uZinja.
Uqhubekele phambili eveza ukuba imfundo kanye lokukhulisa ithalenta lakho ngendlela eqondileyo kubalulekile.
“Bengihambe labadlali beBosso abagoqela uPeter Muduhwa labanye bakhe. Abadlali laba ngibalethe ngoba ngifuna abafundi babone ukuthi labo bengenelisa ukufika kuzinga eselifike abadlali laba nxa bangazimisela baxekane lokuthatha izidakamizwa.
Okunye bengigqugquzela kakhulu ukuthi ukuze baphumelele kumele baziphathe kahle batshiyane lokunatha lokubhema okudakayo.
“Isikolo esiwinileyo emdlalweni lo siphiwe impahla zokudlala ibhola le trophy. Kuthi amantombazana lawo athola impahla lebhola okuzabancedisa emdlalweni lo,” kuphetha uZinja.
