mbulelo smpofu
NXA umuntu esethandweni uyambona ukuthi impilo yakhe iphelele sibili ngoba phela uthando luyinsika yempilo yomuntu.
Kuyafana lomntwana nxa ekhuliswa ngothando ngabazali bakhe kumbe labo ahlala labo, uyabe ekhanya ukuthi uchelesile empilweni.
Kuyadanisa ukuthi ngalezinsuku kukhanya uthando alusekho ebantwini, sekuvame ubhova nanko imihla ngamalanga sihlala sisizwa ukuthi abantwana babhinyiwe, umntwana ubulele unina kumbe indoda ibulele umkayo.
Lokhu ukuthi abantu bayathandana kube kuhle kubenjeya kukhanya hatshi akusekho emoyeni yabantu. Kwakukhona ngesikhathi sabogogo labokhokho.
Bakhona asebehlale bonke okweminyaka eyedlula engamatshumi ayisithupha. Kuyinto enhle kakhulu lokhu esifisa ukuthi ngabe inengi labantu bakulezinsuku bayakulandela. Pho uhlupho olukhona yikuthi khathesi abantu abasaphili iminyaka engafika ama-80. Okunye njalo lezinsuku ukuchitheka kwemitshado kukhanya sekuyifashini. Uyezwa kuthiwa uZibani loZibani batshadile, dukuduku uzwe sekuthiwa umtshado usudatshuliwe.
Hawu bantu bakithi kanti kutheni?
Kungaba yinto enhle ukuthi abantu balandele impilo yabokhokho ngoba kukhanya yiyo elekusasa enhle. Kusizani ukuba ngumehlomehlo umuntu ezakufa lelanga lingakatshoni. Kunje sithi amasiko kawasizi empilweni sikhohlwe ukuthi ogogo labokhokho baphila nje ngenxa yokulandela wona amasiko wonala esesisithi kasiwafuni, ayasiyangisa.
Asilandeleni amasiko bantu bakithi akwaziwa mhlawumbe indubo lezi esibhekane lazo zingasixeka lemikhuhlane le engapheliyo mhlawumbe layo ingaze ithole ukwelapheka njengoba etshilo umuntu omdala ukuthi umhlaba ngeke ulunge nxa abantu bengalandeli amasiko.
Asifundeni-ke isifundo ngalaba bantu abalandela amasiko baphila impilo yabo ende egcwele injabulo kuphela. Kambe ngubani ongafuni ukuphila iminyaka yonke le, ngiyazi kakho, sonke sifuna ukuphila.
Asiwalandeleni amasiko bantu bakaMthwakazi, akwaziwa mhlawumbe lempilo zethu zingaguquka zibezinhle.
shloboe boe
