shloboe boe
KUYADANISA ukuthi kulabantu abaqakathekisa inzuzo yelanga elilodwa basuke bakhohlwe nya ukuthi kulekusasa. Kuvamile ukuthi abantu benze abakubona kuzabalethela inzuzo bekutshaya indiva ukuthi lokhu abakwenzayo kungenza ikusasa yabo ibe yikusasa enjani.
Kuyinto eyaziwa nguye wonke umuntu ukuthi kuqakathekile ukuthi sigcine imvelo ngoba ngaphandle kwayo impilo le esiyiphilayo ayiphileki.
Ukugamula izihlahla yikubulala imvelo kunye lelifa ebesilakho ukulitshiyela ingane zethu. Siyazi ukuthi izihlahla zona vele ziyimpilo ngoba phela kulapho esithola okunengi okudingakalayo empilweni.
Inyamazana zona eziphila egangeni lazo ziqakathekile njalo nxa sitshisa iganga zisuka zibaleke kuthi amanye amazwe abuthe imali ngalezi nyamazana thina sibuzana ukuthi kambe izilwane ebesilazo zingene ngaphi.
Uthola umuntu egamula izihlahla mahlayana nje ethengisa inkuni kumbe amalahle. Uthole omunye esenze umyaba ofika le ngenkuni ezimanzi kanti yizihlahla eziqunywe zaquntwa amahlamvu.
Abanye njalo ngabatshisa amadlelo. Pho izifuyo zidleni nxa amadlelo kungasela?
Abanye ngabathela itshefu phakathi kwamadamu lemifula uzwe kuthiwa inhlanzi ebezilapho kunye lemvubu sekufile.
Kungumlandu womuntu wonke ukuthi alondoloze imvelo ngoba phela ingeyethu. Nxa umuntu angabona yiloba ngubani ephatha butshapha iganga kumbe ethiya inyamazana zendle kaphange azise abomthetho, abotshwe.
Mhlawumbe inengi lalezi zigangi alazi ukuthi kulicala elikhulu ukutshisa amadlelo ngoba lokhu kuyingozi hatshi ebantwini kuphela kodwa lakunyamazana zendle.
Bakhona njalo abalahla igwayi bengalicitshanga besokulumatha utshani.
Otsheketsha labo sebebangele ukugugudeka komhlabathi.
Izulu lithi nxa lingabuya umhlabathi uthanyeleke uyebuthana ndawonye uthole izilimo seziswabile nanku phela ziyabe zihleli emhlabathini ongela kudla okweneleyo.
Kuqakathekile-ke ukuthi njengezakhamizi zalelilizwe sibambane izandla ekuthuthukiseni imvelo yethu sizigqaje ngayo kuzethekeli eziza elizweni kukanti njalo ngasikhathi sinye sithole imali yakwamanye amazwe. Kungumlandu wethu njalo ukuthi izizukulwane zethu zithole ilizwe leli lilokhu lilenyamazana zendle njengalokhu lathi salifica lilihle.
Asibambaneni izandla-ke silwise izigebengu kunye lezikliwi zona-ke ezisuka zikhangele izamba zazo kuphela.
