Siphakeme .Mnindwa
Ugwalo Emfuleni Wezinyembezi olwalotshwa nguEzekiel S.K Hleza
Ophezulu Stinta
Siqhubeka ngogwalo lwethu kusahluko sesitshiyagalolunye, lapho udaba lwezombusazwe luqhubeka abasegangeni kanye labasemakhaya bexhumana ngewayilesi ukuzwa ukuqhubeka kwezindaba kunhlangothi zonke zelizwe.
Ngokusetshenziswa kwewayilesi, sinanzelela ukuthi ilizwe laseliphakathi kwesikhathi sokuthuthuka nxa ukukhulumisana kwasekufinyelela abantu ngohlobo lwewayilesi. Iwayilesi leli lalixhumanisa kanye lamanye amazwe afana leBotswana kanye le Melika.
Siyananzelela ukuqakatheka kwewayilesi ngezokuxhumana. Abafana beganga kubikwa babhala incwadi bebhalela umbusi bezibika ukuthi bona babelande impi hatshi umdlalo, njalo babefuna ukuqondana lamadoda uqobo hatshi insane ezinuka uchago emakhaleni.
Lokhu ke kuchaza ukuthi amadoda la ayezizwa ngempela ngokuthi lokho abasebezimisele ukukwenza asikho ababehlangana lakho, ngakho ngamadoda azimisele kakhulu kulokho abayabe sebekuhlelile ukuthi bayakwenza.
Amadoda eganga la asobantu abazimisele umdlalo, laba ngabantu abalinde impi ngokwayo, bathi bazihlele ukuthi umbhobho uzakhala uze uthule ngokuphela kohlamvu, pho ke uhlamvu luphela umuntu yena engaphi endaweni ezinjalo, kusobala nje ukuthi imphefumulo yabantwana babantu iyaphela, kuchitheka igazi ligcwale indawana yonke, kube yizililo, abancane kanye labadala. Ngempela kwakungaso sikhathi esilula, ubani lobani ophilayo wayefisa nje lokuthi ngabe wadlula emhlabeni kudala le.
Kuvuka udaba lokufa kwenkokheli eyathiyelwa ibhomba emoteni yafela eLusaka. UMasolombana bayahebeza ngelithi kambe kwakungaso msebenzi wamabhunu na lowo, evala indlela yenkululeko. Indlela yenkululeko iphakanyiswa, imelwe ngulowo egelezela ngakuye kuthi lo ongelani layo adinge zonke indlela zokumisa imizamo yonke yenkululeko, ngulowo lalowo ukhangela uhlangothi lwakhe, kungakhathalekile ukuthi kulezinhlungu eziqukethweyo.
KweleNgilandi lakhona kubuthenwe kuhlanganiswa amakhanda kodwa nje kwabasobala ukuthi ondlebe zikhanya ilanga babeqinise amakhanda abo kwaphela nje, uSmith labanye bakhe babengatshibilikisi ngitsho intamo le. Kusobala, babezibona belelungelo elizweni labansundu, ubunzima obukhulu ngempela.
