Siphakeme .Mnindwa
Ugwalo Emfuleni Wezinyembezi olwalotshwa nguEzekiel S.K Hleza
Ngeviki edlulileyo sitshiye uDingilizwe esengothutshe ngakibo okwethusayo. Wayesazi konke okwakuqhubeka kanye lokuthi umdeni wakwakhe wawudutshuzwe wadutshuzwa basinda ngomusa nje ukuthi baye kogoqa nyawo.
UDingilizwe kazange anikeze amazwi enduduzo ngitsho kunina kodwa wagcizelela ngelithi babephakathi kwesikhathi esinzima kakhulu njalo umumo wawuqhubeka usiba nzima ngamandla, uzakuba nzima ngendlela yokuthi ilizwe lalizatshona ligalula phakathi komfula wegazi.Sihlangana lokugcwaliseka kwesihloko sogwalo njalo,kulesisahluko.
UDingilizwe uyabuza kunina ngomfowabo uSidingani. Lapho uDingilizwe esizwa ukuthi ulisotsha ukhihliza amagama asindayo adabula phakathi kwenhliziyo njengomhedla wengqamu esiswini esalala labo bantwana bobabili.Amazwi athi: “Ngilusizi mama ngoba lapho esizadibana khona uSathane uzakwehla lapha akhe khona azokhala izinyembezi.”
Ngabantwana bethumbu linye laba , abatshiyelana ibele,impi ibadabula phakathi, umnawabo bobabili wafa kabuhlungu etshiswa ngamabhunu, okudida uDingilizwe yikuthi uSidingani ukwenza njani ukuthi ayobambana labantu abathontisa igazi lomfowabo, abe ngomunye wabo. UMaMoyo laye wayengela mpendulo, ngaphandle kokuchiphiza inyembezi, umumo wakhe wawusungaphezu kwamandla akhe, lapho ecabanga ngethumbu lakhe kwakungekho nje lokukodwa okwakuthoba kumbe kududuza inhliziyo yakhe,umbangazwe wawuthumbe ithumbu lakhe ngendlela ezwisa ubuhlungu kakhulu. UDingilizwe ukhuluma labanawakhe ebaxwayisa ngelithi bangaze bahamba ngendlela eduhayo behugwa yimali okuqakathekileyo yikulwela ilizwe labo, njalo bangaze bathathela lomnewabo USidingani oligola. Sinanzelela ukugcwaliseka kwebizo lakhe elithi Sidingani elingumbuzo omkhulu ukuthi ngempela kuyini okudingwayo, nxa sekubuzwa kusobala ukuthi into yakhona ayibonakali njalo asolutho olugculisa inhliziyo.
Lapha esiligola nje elidla lesitha kuyagcwaliseka ukuthi laye vele kazazi akudingayo uphetshulwa ngumoya nje.Lapho sikhangela ibizo likaDingilizwe kusobala ukuthi ulwela ilizwe, yilo njalo afisa, akhangelele ukuthi libuye emandleni abantu abamnyama bathole uzibuse wabo, bahlale ngokuthula. Utshiya njalo ebancwebe udlebe ukuthi yena igama lakhe leguswini nguMgandane njalo bangaze basebenzisa elithi Dingilizwe elangekhaya, yikho esinanzelela khona ukuthi nguye lo uMgandane owayeqethula isotsha lamabhunu egangeni.
