Siphakeme .Mnindwa
Bhekimpilo Tshalibe
KULENDODA eleminyaka engu-34 egwetshelwe ukuyapika inyanga ezingu-10 ejele ngumthethwandaba weGweru ngemva kokutholakala ilecala lokubulala impahla kanye lokutshaya umfazi bebanga ukutshintsha itshaneli kumabonakude.
Kubikwa mhlaka 11 Mpalakazi, umsolwa watshaya unkosikazi wakhe oleminyaka engu-35 ngemva kokuba bebelokungezwani phakathi kwabo bebanga ukutshintsha itshaneli kumabonakude.
Kuzwakale ukuthi umsolwa waba lodlame watshaya umabonakude wabo oyi-32 inch ngestina wafa, njalo waqeda lapho watshayelela i-decoder emdulwini.
Kubikwa umsolwa waphinda watshaya umfazi ngamampama kanenginengi qede wamtshaya ngezibhakela umzimba wonke, emkhahlela ngesicathulo.
Unkosikazi wakhe wabikela amapholisa ngaloludaba okwenza umsolwa wabotshwa.
Umsolwa ugwetshelwe ukuyapika inyanga ezingu-10 ejele. Ukhitshelwe inyanga ezimbili esimeni sokuthi ebhadale impahla azibuleleyo ezibiza iUS$$295.
I-National Prosecuting Authority of Zimbabwe ikhuthaze uzulu ukuthi ayekele udlame njalo axazulule indaba ngokukhulumisana.
“I-NPAZ ikhuthaza uzulu ukuthi ayekele udlame njalo axazulule indaba ngokukhulumisana,” kuphetha i-NPAZ.
