Siphakeme .Mnindwa
Innocent Kurira
OFUNA ukuba lilunga lebhodi yeZifa, uXolisani Gwesela, uthe nxa engakhethwa uzakhankasela ukuthi kukhutshwe umthelo we- 6 phesenti edonswa kumaqembu akuPremier Soccer League (PSL) emalini engena ngelanga lomdlalo.
Leli inyathelo liyindikimba yomkhankaso kaGwesela, nanko uqina ngokukhuthaza ukugcinwa kakuhle kwenhlelo zemali lentuthuko emdlalweni.
Ngokukhipha umthelo we-6 phesenti uGwesela ukholelwa ukuthi amaqembu azakwazi ukufaka imali enengi ekuthuthukisweni kwabadlali, izakhiwo lokunye okubalulekileyo.
Phezu kwalokho, uGwesela uzibophezele ukuthi uzaxoxisana leSports and Recreation Commission (SRC) ukuze kuqedwe ukudonswa kwe-6 phesenti kumaqembu ePSL.
Inyathelo leli kulindeleke ukuthi liqhubeke lehlise umthwalo wemali emaqenjini ovumela ukuthi agxile ekuncintiseni enkundleni eziphezulu.
Umkhankaso kaGwesela uphinde wafinyelela kwezokubusa, lapho akhuthaze khona ukuthi kukhitshwe inhlawulo yenhlanganiso ebhadalwa ngamalunga eZifa kanye lemali yokubhalisa abadlali ebhadalwa ngamaqembu.
ZIFA
Lokhu, ukholelwa ukuthi kuzasiza ekwakheni uhlelo lwebhola lenyawo lokuhlanganisa abantu bonke ngokulinganayo eZimbabwe.
Okunye njalo uGwesela ugcizelele ukuthi kumele kuqakathekiswe inhlalakahle yezisebenzi zeZifa, wathembisa ukuthi uzabona ukuthi iholo kanye lenzuzo yezisebenzi ibhadalwa ngokugcweleyo ngesikhathi. Lokhu, ukholelwa ukuthi, kuzasiza ukukhulisa isimilo lokugqugquzeleka phakathi kwabasebenzi.
“Njengomuntu otshisekayo ngebhola laseZimbabwe, ngizimisele ukwakha ikusasa elihle emdlalweni wethu esiwuthandayo,” kutsho uGwesela.
“Lezi iziphakamiso zenzelwe ukuvula amandla apheleleyo emvelo yebhola lethu, njalo ngijabulile ukusebenzisana labantu abasekela umdlalo wethu behlose ukuthi kube lenguquko le engikhankasa ngayo.”
UGwesela ufunde okuzwayo, okuyikhona okumenza ahambe phambili kulabanye ancintisana labo kukhetho.
Ulezithupha zemfundo yaphezulu ezibalisela iMasters of Science in Media and Society Studies, a Postgraduate Diploma in Media and Society Studies leBachelor of Science (Hons) in Administration.
Useleminyaka ekunguqu nanko wasebenzela engu-Caf General Co-ordinator, Cosafa General Co-ordinator lokuba nguZifa Administrator. Useke wazibamba kuZifa eyisikhulumi senhlanganiso, lokuba ngu-Chief Operations Officer.
Ukhetho lweZifa luzaqhutshwa mhlaka 25 Zibandlela.
UGwesela uncintisa loChris Mtungwazi, Sharrif Musa, Alois Bunjira, Morgen Dube, Sunday Chidzambga, Andrew Tapela, Tizirayi Luphahla loSibekiwe Ndlovu.
