Siphakeme .Mnindwa
Ethel Ncube
ISABELO seMidlands sesilahlekelwe ngabantu abafika 10 kuyonale inyanga kuphela, kulandela ukuthathwa ngamanzi imfula igcwele, ukugalula kanye lokutshaywa yinkosazana.
Kuvezwe ukuba izulu liyafunakala njalo kumele line kodwa uzulu kumele azinakekele njalo anakekele labantwana bangadlaleli emanzini nxa imfula igcwele.
Kubikwa ukuba phakathi kwabathathu abagalula eZvishavane, ababili ngabantwana ababebhukutsha kuthi oyedwa ngumuntu omdala owathathwa ngamanzi echapha umfula ogcweleyo. Ababili ngabeMberengwa njalo kubikwa batshelela bechapha bathathwa ngamanzi, omunye ngumntwana weKwekwe oleminyaka elitshumi owabanjwa yingwenya edlalela emfuleni ugcwele, oyedwa ngoweSilobela, wawela emgqonyeni ogcwele amanzi wedlula emhlabeni, kuthi ababili ngabeKwekwe abatshaywa ngumbane besemasimini, amalanga atshiyeneyo.
Iphephandaba likazulu lixhumane lesikhulumi samapholisa eMidlands, uInspector Emmanuel Mahoko obike ukuba abantu abazinakekele ngesikhathi sezulu.
“Asizameni ukwehlisa amathuba okufa ngokulandela esihlala sixwayiswa ngakho ngesikhathi sezulu. Kumqoka ukuthi abantu bangahlali phandle izulu lisina, umfula ogcweleyo kawesatshwe, abantwana kabahlale bekhangelwa njalo besaziwa lapho abakhona ngaso sonke isikhathi. Kumele njalo baxwayiswe ngobubi bokubhukutsha emifuleni ngalesi isikhathi.
“Nxa kumele abantu bahambe kumbe sithi belohambo, kabaqale badingisise ukuba lapho abayakhona izulu kalisoze line kakhulu imifula icine isigcwele.
“Abazali kumele njalo bakhangele abantwana abakhasayo ukuba abadlaleli duze kwamachibi, imigodi kumbe amabhakede alamanzi, nxa amabhakede elamanzi kahlale evaliwe.
“Abatshayeli akumelanga bachaphe ngezimota umfula ugcwele ngoba ulakho ukuba uthathwe ngamanzi balahlekelwe yimpilo. Nxa umfula ugcwele ungaqali ukuzama ukuwuchapha, linda amanzi aze ehle ukuze ungathathwa ngamanzi,” kuphetha uInsp Mahoko.
