Siphakeme .Mnindwa
Mthabisi Tshuma
LOBA abalimi bejabulela ukuna kwezulu, abasesigabeni seBulilima, esabelweni seMatabeleland South bakhala bengaqedi ngokubhidlika kwebholoho leMajazi, elise mgwaqweni osuka edolobheni lePlumtree usiya kumngcele weMaitengwe Border Post.
Ibholoho leli, eliseHingwe Ward, libaluleke kakhulu kuzakhamizi zakulindawo ngoba zidlula kulo nxa ziqonde ukuyadinga okuthile kumbe ukuvakatshela eBotswana laseSouth Africa. Kulandela ukudilika kwalo ngoMpalakazi, izimota sezidlula nzima, kukanti amabhasi labomalayitsha sebekhethe ukuthi bekele ukusebenzisa lumgwaqo.
Lokho sokubangele ukuthi kumiswe inhlelo ezinengi eziphathisa umphakathi, nanko phela ibholoho lidilike ngesikhathi lezikolo zivulwa. Kulokwesaba ukuthi umgwaqo uzagugudeka ngamandla njengoba izulu liqhubeka lisina.
Kubikwa ngokuna kwezulu, amanye amabholoho adilikileyo esigabeni seBulilima agoqela eleMakawule eliseNdiweni Ward leleGampu (Matjinge Ward). Lomgwaqo ohlanganisa iPlumtree leBhagane ukusimo esibi.
Lokhu sekukhathaze leziphathamandla zemisebenzi kazulu kulindawo, ngokutsho kukaMnumzana Onesimo Zogara, uBulilima District Development Co-ordinator.
UMnu Zogara uthe kudingeka ukuthi kulungiswe imigwaqo lamabholoho kulesisigaba.
“Sikhathazeke kakhulu ngesimo esibi seminye yemigwaqo yethu eBulilima. Imigwaqo yethu eminengi emikhulu kunye laleyo emincane ilubhuqu ngakho kumele inakekelwe ngezikhathi ezithile ukuze kuhambeke lula kuyo. Iziphathamandla zethu ezintathu ze-Road Authority, okumele zilungise imigwaqo le zibhekane lenkinga zokuswela imitshina eyaneleyo ukuze zenze umsebenzi wazo ngempumelelo.
“I-Emergency Road Rehabilitation Programme (ERRP) kaHulumende isebenze kakhulu ekuqinisekiseni ukuthi imigwaqo yethu iyalungiswa, kodwa kuyadingeka ukuthi kuphakanyiswe ingatsha okumele zilungise imigwaqo ngemitshina ukuze kungabi lokuthembela kwemitshina yabanye,” kutsho uMnu Zogara.
Uthe bazaqhubeka lenhlelo zokulungiswa kweminye imigwaqo kulindawo.
“Okwakhathesi, uHulumende usenike imvumo kumankampani azalungisa imigwaqo ebalisela owePlumtree-Maitengwe lowePlumtree-Ndolwane kuhlelo lokufaka ithara (tar) kumgwaqo osuka ePlumtree usiya eMaitengwe.
“Sithobekile ngokukhuthala lokuzinikela kwe-Second Republic ekufezeni izithembiso zayo zokungatshiyi muntu loba indawo ngemuva,” kutsho uMnu Zogara.
Ummeli weBulilima edale lePhalamende, uDingumuzi Phuti, uthe iziphathamandla zemigwaqo kumele zisukumele ngokuphangisa ukulungisisa loludaba ngoba luphazamisa ukukhula komnotho welizwe.
“Udaba lwebholoho leMajazi asilona udaba lwebhajethi kodwa ludaba lokuzimisela lokuxazulula kugatsha lweMinistry of Transport esabelweni. Sizamile ukuthi sixhumane labo ukuze baze lapha bazokwenza umsebenzi wokubeka kakutsha ibholoho, kodwa akukho osekwenzakele kuze kube lakhathesi. Ngakho-ke khathesi sekulenkinga yokuthi sekunzima ukuthi abantu bayefika kumngcele wethu weMaitengwe Border Post lokuthi kuhanjwe kulumgwaqo ohlanganisa idolobho lePlumtree, leTsholotsho, Lupane, lezinye indawo ezinengi.
“Kuyisicelo sami sokuthi lelibholoho lilungiswe njengoba lixhumanisa abantu leMaitengwe Border Post, umngcele wethu leBotswana leSouth Africa. Kulamabhizimusi amanengi kulindawo asephakamise iBulilima leMatabeleland South. Kuqakathekile ukuthi umsebenzi wokulungiswa kwebholoho lemigwaqo le uqakathekiswe,” kutsho uCde Phuti.
Uthe ukubhidlika kwebholoho sekuthinte abantu bakulindawo asebengene kundleko ezinengi.
“Ukulungiswa kumbe ukwakhiwa kakutsha kwebholoho leMajazi sekume isikhathi eside njalo sikhathazeke kakhulu ngalokho. Kuhlasele abantu bakulindawo njengoba bengasenelisi ukuyafika ngqo eHingwe laseBambadzi nanko kumele basebenzise umgwaqo omude obadlulisa eMadlambudzi kuqala, badlulele eKhandamhlophe leMbimba. Akumelanga ukuthi abantu bahlupheke ukuze bafinyelele indawo.
“Mina ngokwami, ngibeka ithemba kuHulumende weSecond Republic ukuthi konke lokhu kuzalungiswa lokuthi abantu bakithi bazanikezwa impilo efaneleyo, abayifisayo,” kutsho uPhuti, ophinda abenguMsekeli kaMphathintambo wogatsha lwe-Information Communication Technology, Postal and Courier Services.
