Siphakeme .Mnindwa
Zimpapers Sports Hub
PHAKATHI kwabantu abangamatshumi amathathu lasikhombisa abazancintisa kukhetho oluzayo lweZifa, bayisithupha kuphela abesifazane.
Lokhu sekukhathaze inengi kumdlalo kanobhutshuzwayo kuleli ababisa losaziwayo uStanford “Stix” Mtizwa othe kumele kube lotshintsho, kukhuthazwe abesifazane ukuthi bengesabi ukuncintisela izikhundla zobukhokheli.
I-Zifa izakuba lokhetho lukamongameli, abasekeli bakhe ababili kunye lamalunga ebhodi ayisithupha mhlaka 25 Zibandlela.
Abesifazane abayisithupha laba nguKudzai Kadzombe, Alice Zeure, Sabelo Maphosa, Sibekiwe Ndlovu, Cecilia Gambe loBeaullar Msarah.
Isisekelo sombuso esitsha seZifa siyaqinisekisa ukuthi omunye wabasekeli beZifa kumele kube ngowesifazane, kodwa inengi labosaziwayo bebhola abagoqela uStanford “Stix” Mtizwa bakhuthaza ukuthi kube labesifazana abanengi kubhodi.
UMtizwa, owayengumdlali weqembu lesizwe owaphinda wanqoba isicoco seligi leCaps United kunye leBlack Rhinos ngeminyaka yabo-1980s usekela umqondisi weDutch Academy uKudzai Kadzombe esikhundleni sokuba yilunga lebhodi.
“Sekulesikhathi eside ngimazi uKudzai Kadzombe lomkakhe bebambe umsebenzi omuhle wokusekela ibhola ngaphansi kwe-Dutch Academy.
“Ikolitshi le i-Dutch Academy silolonge inqwaba yabadlali abahambe bayadlalela amaqembu ePremier Soccer League. Abanye bachapha ngitsho uLimpopo besiyadlala eSouth Africa,” kutsho uMtizwa owangena kanengi kukhalenda yama-Soccer Stars ngama-1980s.
UKadzombe uphinde waba lesandla ekuthuthukiseni ibhola emazingeni aphansi endaweni ezilabantu abanengi njengeHighfield.
I-Dutch Academy isikhiphe abadlali abanengi abenze kuhle enkundleni ababalisa uDonald Mudadi owathola isicoco sokuba yi-runner up yeSoccer Star of the Year ngo-2023 kunye lomgadli weNgezi Platinum Stars uDelic Murimba.
Ngokunjalo, uMtizwa uthe nguye umuntu okumele avotelwe kubhodi ngoba imisebenzi yakhe iyabonakala.
“UKadzombe wazama ukusukumisa inguqu kuma-Area Zone Highfield ngokusungula umqhudelwano wamaqembu angamatshumi ayisithupha. Wathengela amaqembu amanengi ama-kit wenelisa njalo ukusekela ngemvuzo yemali, imendulo lenkezo, okuyikho okwakhuthaza abadlali abasakhulayo.
“Ukuzinikela kwakhe kutsho okunengi ngomsebenzi asewenzile lokuthi uzakuba yinsika yokuphakama kwenguqu yakithi nxa engavotelwa kubhodi yeZifa. Umbono wami yikuthi abesifazane kumele baphiwe ithuba lokukhokhela,” nguMtizwa lo.
