Siphakeme .Mnindwa
Nkosilathi Sibanda
WASUKA eTsholotsho eqonde koBulawayo engazi ukuthi ithalenta lakhe lizamphosela ngale kukaLimpopo.
Waqala ngokucenta indlela yakhe kwezomculo esakhula, ehlabela ingoma zikaMaskandi, waphinda njalo wasungula iqembu laBafana BakaMzilikazi. Khathesi inengi labathandi bakamabonakude bazambona engumlingisi kumidlalo ebalisela Isiphetho The Destiny lakuSmoke and Mirrors, ekhitshwa ku-e.TV.
Yiyo imbali kasaziwayo kwezokuthokozisa uzulu, uKeith “Doit” Nkomo.
Emuntwini odabuka emaguswini eTsholotsho, ukufinyelela ama-studiyo emidlalo elandelwa kakhulu eMzansi kwaba liphupho akade engacabangeli ukuthi engalifeza, nanko uqale ukulingisa okuphakemeyo ngomnyaka ka-2022.
UNkomo, esethula ngomsebenzi wakhe eMzansi, utshele iphephandaba likazulu ukuthi usebe yingxenye yabalingisi abadlule ngaphansi kwamankampani ama-casting agencies ambalwa ukuze akhulise ithalenta lakhe.
“Ngaqala ukuba ngumlingisi komunye umdlalo wasekhaya othi Inotho Yegazi, lobanje ingazange isaphumelela ngenxa yokuswelakala kwemali. Kusukela lapho, sengithole amathuba amanengi, okuba ngumlingisi kumidlalo etshiyeneyo. Lokho kuncede kakhulu ukuthi ngikhulise ithalenta lami.
“Khathesi ngathola ithuba lokulingisa kumdlalo kamabonakude eSouth Africa othi Isiphetho The Destiny, ophuma ku e.TV. Ngilingisa ngingu Mover Boy, ngingomunye walabo abazokhipha impahla endlini, kulungiselelwa umngcwabo kaJustice. Nganikezwa lelithuba, ngaphiwa imizila yokukhuluma njalo ngenza kakuhle kulokho. Ngiphinde ngathola elinye ithuba lokulingisa kumdlalo weSmoke And Mirrors, lawo odlalwa ku e.TV njalo ababukeli bazangibona mhlaka 25 Nkwenkwezi, ngingu Culture Man,” kutsho uNkomo, ekhuluma lentatheli ngoLwesibili kuliviki.
Uthe useke wathola amanye amathuba okulingisa kwezinye inkundla njalo ukhangelele ukuthi akhulise umsebenzi wakhe usabalale umhlaba wonke.
“Sikhuluma nje, ngithole umsebenzi wokulingisa kuMpondoland Film, kumdlalo ozakhitshwa ku-Netflix lakuShowmax ekuqaleni kukaMbimbitho. Le yimpumelelo enkulu kakhulu kimi.
“Ngalezi zindima ezimfitshane engiziphiweyo kumabonakude, ngisebenza nzima ukuqinisekisa ukuthi ngibambe indawo yami njengomlingisi omkhulu. Ngikhulisa ithalenta lami nsukuzonke.”
Uthe loba esegxile kwezokulingisa, kasoke atshiye kwezomculo ngoba yilapho aqala khona.
“Ngikhona emculweni, ngeke ngitshiye. Abalandeli bami abalinde ngokubekezela ngoba kukhulu engibaphekela khona ngasese. Ngilamaphurojekthi amatsha azayo kunyanga ezilandelayo.”
Ngokomculo, uDoit waziwa kakhulu ngengoma ezithi Uyamangaza lenye ekaMaskandi ethi, Nkosisikeleli Africa.
