mbulelo smpofu
Nkosilathi Sibanda
ABALANDELI bomculo we-jazz koBulawayo bazathola isipho seKhisimusi masinyane lonyaka esizavela kungcitshi yomculo we-jazz, uJeys Marabini.
Kukhangelelwe ukuthi umdumo wesiginci sikaMarabini usukumise ababukeli abazathi gwaqa enkundleni yeKings Kraal ngoLwesine ntambama.
UMarabini kakaze aphoxe abalandeli bakhe nxa esestikini njalo ubika ukuba kathembisi lutho ngaphandle kokuthi uzajabulisa abantu okwedlulisileyo, bangene kukhefu leKhisimusi beledlabuzane.
“Kangithandi ukutshela abantu ukuthi kuza kwenzekani kodwa. Ngifuna ukuthi bakhulume ngemisebenzi yami.
“Kulumcimbi kuzabe kulabaculi abagoqela uThandi Dlana, Tariro Negitare loTanga WekwaSando labanye., ukubala abambalwa,” kubika uMarabini ngoLwesibili.
UMarabini uthe kakhohlwa abalandeli labamxhasa ngemali, okuyibo abamenze waphumelela kwezomculo. Ubancome ngosekelo lwabo ngezikhathi zobunzima.
“Ngaso sonke isikhathi nxa nginxuswe ukuthi ngijabulise abantu kuloba yiwuphi umcimbi, into yakuqala engiyenzayo yikuthandaza ngibonge uNkulunkulu labokhokho bami ngesipho abangipha sona. Ngemva kwalokho, ngibonga uxhaso engilutholayo lothando lwabalandeli olungapheliyo.
“Iziphiwo zethu ngeke zisiphathise nxa kungela abalandeli lalabo abaxhasa ngemali lokunye. Akula umculi ongaphumelela engela sekelo,” kutsho uMarabini.
Ucele uzulu ukuthi eze ngobunengi, kugcwale phamu eKing’s Kraal.
“Ngicela abalandeli bethu beze ngobunengi babo bezojabula, emcimbini ozabumkhulu kulayo yonke ngomnyaka ka-2024.
“Njengabaculi abalinxusayo, sizakwenza konke okusemandleni ethu ukuthi lijabule. Ngaphezu kwalokho ngiyazi ukuthi bonke abaculi abazabe bekhona bazakwethula umculo omnandi.”
shloboe boe
