mbulelo smpofu
Nkosilathi Sibanda/Fungai Muderere
AKUBIZWA abazwayo kumdlalo wenguqu yakuleli ngoLwesihlanu ntambama lapho okuzabe kulomcimbi wokuthakazelela abadlali abakhethwe njengentshantshu zomdlalo kulisizini, kuligi yeCastle Lager.
Kuzavulwa njalo incwadi ezethula umdlali owedlule bonke.
Ngokuhlaziya kweZimpapers Sports Hub, umbango wesicoco se-Soccer Star of the Year uphakathi kukaLynoth Chikuhwa oweHighlanders, Walter Musona (Simba Bhora) loKhama Billiat (Yadah Stars).
Lisiya kunina, kukhangelelwe ukuthi inkundla zokuxhumana zigcwale amabizo abafana bobathathu. Okwakhathesi, kusalindwe oLwesihlanu, kusobala ukuthi abadlali laba batshaywa luvalo ngoba bonke bayasifuna isicoco.
Abanye abadlali abakhethwe kukhalenda yalonyaka nguBlessing Sasha Moyo (Simbas Bhora), Donovan Bernard (Chicken Inn), Emmanuel Jalai (Dynamos), Godknows Murwira (CAPS United), Isheanesu Mauchi (Simba Bhora), Kingsley Mureremba (CAPs United), Tymon Machope (Simba Bhora) loWebster Tanaka Tafa (Simba Bhora)
Incwadi elamabizo la kubikwa ivalwe ngci njalo izavulwa phambi kwenkundla ezakuthi gwaqa esigodlweni ngoLwesihlanu ntambama.
Abadlali bakhethwe ngeviki edluleyo intatheli zihlangene labaqeqetshi labokaputeni bamathimu wonke akuPSL. Ukhetho lolu, lwavuthisa ulaka kwabanye kumuli yomdlalo wenguqu, kodwa kwakukhangelelwe ngoba imibono itshiyana.
Ezinye izicoco zizaphiwa umdlalo osakhulayo othembisayo, unozinti lalo ohlohle amabhola amanengi. Kubonozinti inhlanhla izawela koweChicken Inn uDonovan Bernard, kuthi kwesomdlali osakhulayo singaya kuKingsley Mureremba.
Intshantshu zeligi ka2024, iqembu leSimba Bhora, lilabadlali abahlanu kukhalenda.
Umdlali weBosso, uChikuhwa ozathwala isicoco sokuhlohla amabhola amanengi, uthe ujabule kazazi.
Wahlohla amabhola alitshumi lasikhombisa.
“Konke kwenzeke ngokusebenza nzima lokuzinikela. Ngibonga kakhulu abanye abadlali kunye labaqeqetshi bethu uKelvin Kaindu, Agent Sawu loTry Ncube.
“Bonke banginike isizatho sokukholelwa emdlalweni wami.
Lomqeqetshi uKaindu ubike ukuba uthabile ngomdlalo kaKaindu.
“Usenzele kahle kulisizini njengoba besimkhuthazile ngaphambi kokuthi siqale umkhankaso. Usihlohlele amabhola amqoka kakhulu, siyamjabulela.
“Bekuyisizini yakhe njalo sibonga abanye abadlali abamsekelayo,” kutsho uKaindu.
UBernard kazange ahlohlwe kumidlalo elitshumi lambili, evimbela amaGamecocks, wona acina exegisa loba nje eqale kakuhle.
Ubeyinsika eqenjini njalo ukudlala kwakhe kuzamfaka esiqongweni sokuthi ahugwe ngamanye amaqembu, ikakhulu aphetsheya kwelizwe.
Umdlali uphenduke kuleli evela kuKaizer Chiefs lapho afika wehlisa umdlalo wakhe.
Iqula lama-Soccer Star of the Year 2024:
UBlessing Sasha Moyo (Simbas Bhora), Donovan Bernard (Chicken Inn), Emmanuel Jalai (Dynamos), Godknows Murwira (CAPS United), Isheanesu Mauchi (Simba Bhora), Khama Billiat (Yadah Stars), Kingsley Mureremba (CAPs United), Lynoth Chisepe Chikuhwa (Highlanders), Tymon Machope (Simba Bhora), Walter Musona (Simba Bhora), Webster Tanaka Tafa (Simba Bhora)
shloboe boe
