Siphakeme .Mnindwa
Ethel Ncube
YILOBA izulu libangele umonakalo omkhulu ezikolo ezehlukeneyo esabelweni seMatabeleland South izifundo ziyaqhubeka ezikolo lezi.
Kubikwa kulezikolo ezingu-20 ezisesabelweni lesi ezabhidlizwa lizulu elinayo elizweni lonke. Kwezinye izikolo amakilasi asala engelaphahla kulandela ukuthathwa ngumoya okwabangela ukuthi amabhuku abafundi anethwe lizulu.
Abafundi baqhubekela phambili ngezifundo zabo loba abanye babo befundela egcekeni.
Izikolo ezehlelwe ngumonakalo lo obangelwe yikuna kwezulu zibalisa iMqabuko High School, Mgadla Primary, Simpati Primary, St Sebastian Secondary School, Bidi Primary, St Maria Primary, Gohole Secondary School, Lubhangwe Secondary, Halale Primary, Donkwedonkwe Secondary School, Sun Yet Sen Primary, Tshelanyemba Primary, Nyashongwe Primary, Tudi 2 Primary, Silozwi Secondary, Kafusi Primary, Cobeni Primary, Dry Paddock Primary leSinkamaswe Primary.
Ekhuluma lentatheli omunye umzali olomntwana ofunda eSun Yet Sen uveze ukukhathazeka ngokuthathwa kophahla lwesikolo.
“Kwangihlukumeza kakhulu ukuthathwa kophahla lwesikolo. Ingwalo zabafundi zokubala lezokubhalela zonke zanethwa lizulu uphahla soluthethwe ngumoya.
“Abantwana bafunda nzima lezinsuku. Izingwalo aziseneli. Sicela uHulumende angenele kuzikolo zethu lezi sithole usizo,” kubika lumzali.
Omunye umzali uMnumzana John Dube uveze ukuba kudingakala usizo masinyane ukuze abafundi baqhubekele phambili ngezifundo zabo kuhle.
“Amakilasi malutshwane asala elophahla ngokunjalo abantwana kabeneli kuwo nxa izulu lisina. Kuyadingeka ukuba afulelwe masinyane. Izandla zimfitshane njengabazali sidinga ukuncediswa kuzikolo zethu,” kutsho uMnu Dube.
Iphephandaba likazulu lixhumane loProvincial Education Director weMatabeleland South uNkosikazi Beatrice Manjere obike ukuthi kulezikolo ezimbalwa ezabhidlikayo ngenxa yezulu.
“Kulezikolo ezifika 20 ezahlaselwa lizulu lesiphepho. Zonke izikolo lezi zivuliwe ababalisi bakhona bayafundisa, asilahlupho.
“Silusizi ukuthi amanye amakilasi kaselalo uphahla ngemva kokuthathwa ngumoya lesiphepho. Izingwalo lazo zanethwa. Sikhangelele ukuthi izikolo zilungiswe masinyane ukuze abafundi bangaphambaniseki ezifundweni zabo,” kutsho uNkszn Manjere.
Uthe ababalisi bakhona ezikolo bayafundisa akulamntwana ohlezi ngekhaya.
Ugatsha olubona ngezeMfundo yaphansi laphezulu lukhuthaze izigaba ukuthi ziqakathekise ukuphepha njengoba imfula igcwele.
“Hlalani lidinga ulwazi: Hlalani lisazi ngesimo somkhathi njalo lilandele izixwayiso ezivela kulabo abaveza ngomumo womkhathi lapho elikhona. Lingahambi endaweni ezime amanzi amanengi futhi lingachaphi imfula egcweleyo. Nxa indlela zokuya esikolo zingaphephanga, qakathekisani ukuphepha kungangcono lihlale emakhaya isimo somkhathi size sibe ngcono.
“Abazali kumele babikele abaphathi bezikolo nxa abantwana bengenelisi ukuchapha imfula,” kutsho uMnumzana Taungana Ndoro, onguMqondisi wezokukhulumisana kugatsha lolu.
AbeCivil Protection Unit (CPU) esabelweni seMat South baveze ukuthi kulamabholoho ambalwa adabukileyo kubangelwa yikuna kwezulu.
