Kudingwa unyawo lwengwe eTsholotsho

Ethel Ncube

KULANDELA udaba lwenina elalunywa yingwe esiqintini seMathula, eTsholotsho, ekuqaleni kwalinyanga, sekuvele ukuthi izakhamizi zakulindawo zikhuza umhlolo ngesehlakalo lesi ngoba akuzange kubonakele unyawo lwenyamazana le.

Kubikwa kulensolo zokuthi kungani kungazange kube lobufakazi bokuthi ingwe le yaqonda ngaphi, nanko abantu bazama ukulonda unyawo lwayo kodwa ababonanga lutho.

Zikhathazekile izakhamizi nanko ekuqaleni kwabikwa ukuba uViolet Moyo oleminyaka engu-57 yokuzalwa walwisana lesilwane, ikanti kwaku yingwe.

UMoyo walwisana lengwe le yaze yamekela loba nje walimala ebusweni. Wathwalelwa esibhedlela seMpilo wathola ukwelatshwa, wabuyela ekhaya.

Uvalo luhlezi izakhamizi entanyeni ngoba sezicabangela ukuthi ingwe le ingabe iseduzane njalo ilakho ukuluma ibulale abantu lezifuyo.

Udaba lolu selukhathaze lenduna yakulindawo, uGampu, obikele intatheli yephephandaba likazulu ngokungahlaliseki kwezakhamizi.

“Okwakuqala ngibonga ukuthi umama uMaMoyo usephumile esibhedlela njalo ungekhaya eTsholotsho. Ngabikelwa ukuthi unyawo lolu kayisilo lwesilwane, ngolwengwe okutsho ukuba walinyazwa yingwe. 

“Inyawo zengwe leyi zaphelela lapho okwenzakalela khona ingozi. Ingwe le kayizange itholakale kumbe izwakale lapho eqonde khona. Kwadingwa okuzwayo kodwa kwehlula ukuthi ibonakale,” kubika induna uGampu.

Iphephandaba likazulu lixhumane lesikhulumi seZimbabwe Parks and Wildlife Authority uMnumzana uTinashe Farawo okhuthaze abantu ukuthi babike ngokuphangisa nxa behlaselwe zinyamazana.

“Udaba lukamama owalinyazwa yinyamazana lwafika kithi. Esikucela kuzulu yikuthi kungaba lohlupho kumbe ingozi yokulinyazwa yinyamazana, abantu ababike ngokuphangisa emahofisini ekhansili, la esiwabiza ngokuthi yiRural District Council. Ukubika lokhu kuzancedisa ekuthini kube losizo oluvela eZim Parks ngokuphangisa. Bikani hatshi ukuthi sizwe ngabanye abantu,” kutsho uMnu Farawo.

Esinye isakhamuzi seTsholotsho uMnumzana Muzi Moyo uveze ukuba kukhona okutshaya amanzi ngodaba lwenyawo yengwe.

“Okwaluma umama lo waze wathwalelwa esibhedlela seMpilo yingwe, akusiso isilwane. Ukuze sibekwazi ukuthi yingwe abeParks bathi sebefikile bakhangela unyawo bathi lunyawo lwengwe hatshi olwesilwane, loba uMaMoyo esithi kwakuyisilwane.

“Okusididayo njalo esikusolayo yikuthi kukhona okutshaya amanzi ngesiga lesi. Umama lo okwamlumayo kungabe kungasonyamazana. Umzila sawulonda sisonke labeParks kodwa inyawo zengwe zaphelela lapho eyamlumela khona kuphela. Sadinga ilanga lonke sisithi kumbe inyawo zizavela kodwa zazilokhu ziphelela lapho okwalwa khona umama lo lengwe le. Lapha kukhona okungayisikho ngoba umama wabona isilwane abe-Parks bathi asosilwane yingwe kodwa ayitholakalanga kuze kufike lamuhla,” kubika uMnu Moyo.