shloboe boe
Ethel Ncube
ICALA kaliboli, lesisitsho sigcwaliseke ngemva kokuba enye indoda, yelokitshini leNkulumane koBulawayo eyabulala umuntu kuminyaka engu-15 edluleyo yabaleka, ikhangelwe ngamasongo kasigonyela.
UJustin Mpofu owazakala ngokuthi nguRyan Ncube ubotshwe ngamapholisa akoBulawayo ngempelaviki ngemva kokuthola udletshana lokuba wabulala umuntu wabaleka.
Kuvele ukuthi ngoMabasa ngomnyaka ka2010 umetheswacala wabulala uPeter Sithole oweHope Fountain bucwadlana ledolobheni lakoBulawayo.
Kuzwakale ukuthi umetheswacala labanye bakhe bangena endaweni okunathelwa khona utshwala eHope Fountain besiyatshontsha bafika badubula phezulu basebelaya wonke umuntu owayelapho ukuthi alale phansi.
Ngokuswelakala kwenhlanhla kusehlakalo lesi bacina bedubula uPeter Sithole ekhanda wahle wedlula emhlabeni. UMpofu kunye labanye ayelabo babaleka lemali engange-R528, ama-speaker, omakhalekhukhwini le-amplifier.
Kubikwa ngenyanga kaMabasa futhi ngo2010 kwabotshwa uThabani Solomon Mahlaba eZvishavane ebotshelwa icala leli, ngemva kokudubulana lamapholisa kwatholakala okunye ababekutshontshe eHope Fountain.
Lonyaka ngemva kweminyaka engu-15 icala leli lenzakala abacuphi bathola udletshana lokuthi umetheswacala ukhona uzakuvakatshela oninazala eNkulumane. Amapholisa ahle agijima ayakhona bayamthola. Bahlola emoteni yakhe bahlangana lombhobho kanye lengqamu zahle zamkhalela.
Intatheli ixhumane lobambele isikhulumi samapholisa koBulawayo uAssistant Inspector Nomalanga Msebele obike ukuba indaba enjalo isezandleni zamapholisa.
“Thina njengamapholisa akoBulawayo sithanda ukubonga uzulu ngokusiphathisa ngokusipha imbiko edale ukuba sibophe umetheswacala lo. Sithanda ukwazisa uzulu ukuba ungaze udale icala uhlale isikhathi eside okunganani icala aliboli.
“Umetheswacala wayecabanga ukuthi njengoba esehlale iminyaka engu-15 engabanjwanga icala seliphelile engazi ukuthi lokhe limlindile. Sixwayisa uzulu ukuba atshiye umkhuba wobudlwangudlwangu ngoba kucina kudala ukulahleka kwemiphefumulo,” kuphetha uAsst Insp Msebele.
