Siphakeme .Mnindwa
Innocent Kurira
UMSEKELI kamgcinisihlalo weHighlanders uFiso Siziba uzadinga ukuphinda akhethwe kusikhundla lesi, kukhetho lweqembu oluzaqhutshwa mhlaka 2 Mbimbitho.
USiziba, ozaphuma kulesi isihlalo ekupheleni kukaZibandlela, useke waxoxisana labakhokheli bezigaba zabalandeli beHighlanders ebazisa ngesicelo sakhe, ebalula ngemisebenzi aseyenzile kunye lesidingo sokuqinisa ubukhokheli eqenjini.
Uthe kuminyaka emithathu ekhokhela inhlelo zeHighlanders, usephenduke waba ngumuntu okhaliphileyo emdlalweni. Wethule umbiko kumalunga eHighlanders, ecela ukuthi bamvotele.
“Isikhathi sami ngikulesi isikhundla siphela ngokusemthethweni ngo 25 Zibandlela 2025. Langethemba futhi langinika umsebenzi wokuba yingxenye yethimba labakhokheli beqembu lethu elihlonitshwayo. Bekungahambi kuhle kwezinye izikhathi kodwa umsebenzi siwenzile. Okuliqiniso yikuthi kuminyaka emithathu edluleyo ingivezele okukhulu okufunwa liqembu njalo kungenze ngahlakanipha,” kutsho uSiziba.
Ugcizelele ukubaluleka kokuqhubeka kobukhokheli ekuqinisekiseni ukuthi iqembu liyathuthuka.
“I-Highlanders ingena esikhathini esibucayi, lapho okufanele kube lokuqina kunkokheli zayo. Isimo esikhona sobukhokheli kuHighlanders kasivumeli umqondo womuntu oyedwa ngoba sikhuthaza ukusebenzisana. Ngikholwa ukuthi ngifundile njalo ngajwayela uhlelo,” kutsho uSiziba.
Ukhetho lwabaphathintambo lukhangelelwe ukuthi lwenziwe enkundleni yeHighlanders Clubhouse. Abafuna ukuncintisa kumele bathole amafomu ehofisini yeqembu kungakafiki umhlaka 18 Zibandlela.
Kuvotelwa umsekeli kamgcinisihlalo lomgciningcebo weqembu.
