Siphakeme .Mnindwa
Yintatheli KaMthunywa
KULENDODA eleminyaka engu-23 ehlala eCowdray Park koBulawayo egwetshelwe ukuyapika inyanga ezingu-24 ejele, nguMantshi weWestern Commonage, uLearner Khumalo, ngoLwesibili, ngemva kokutholakala ilecala lokuya emacansini lomntwana oleminyaka engu-15.
Kubikwa ngenyanga kaNcwabakazi 2024, uNkosikhona Moyo wavakatshela umamangala ngakibo njalo baya emacansini bengazivikelanga.
Kuzwakale ukuthi umamangala wananzelela ukuthi usezithwele wasebikela unina ngalokhu okwenzakalayo, unina wasesiyabikela amapholisa.
Umamangala wahanjiswa esibhedlela ukuthi ayehlolwa.
Umtshutshisi, uMelissa Dube, uthe umsolwa uzapika inyanga ezingu-24 esejele.
“UNkosikhona ugwetshwe ukuyapika inyanga ezingu-24 njalo wakhitshelwa inyanga ezine esimeni sokuthi kasoze aphinde edale icala elifanayo okweminyaka engu-5 ezayo,” kutsho umtshutshisi uDube.
Kusenjalo, kulamadoda amabili avela eMatshobana, koBulawayo amiswe phambi kukamantshi weWestern Commonage uLearner Khumalo ngoLwesibili esetheswa icala lokugqekeza.
Kubikwa mhlaka 2 Zibandlela kuwonalo umnyaka, uTatenda John Chari (34) loNtandoyenkosi Mpofu (24) basebenzisa ithuba lokuthi umnikazi wendlu wayengekho basebebulala isivalo semuva bangena endlini njalo batshontsha impahla ezigoqela omabonakude, ama-suitcase, ama-cylinder egas lama-laptop. Kuzwakale ukuthi basebenzisa imota engaziwayo ukuthwala impahla njalo bahamba lazo bazabelana bayazigcina lapho abahlala khona.
Kubikwa uJohn Chari wabotshwa njalo waseqamba uNtandoyenkosi, okwenza kwatholakala ezinye impahla lapho ahlala khona.
Ezinye impahla zatholakala lapho okuhlala khona omunye abelaye betshontsha njalo impahla zonke ezazitshontshiwe zazibiza imali engange US$7 873 njalo kwatholakala ezibiza i US$6 717.
UChari ugwetshelwe ukuyapika inyanga ezingu-26 njalo untando ugwetshelwe ukuyapika inyanga ezingu 24 ejele.
