Siphakeme .Mnindwa
Fungai Muderere
KUZATSHEKA ibhulugwe, kukhale amadoda mhla kuqhutshwa ukhetho lweZifa kulimpelaviki.
Amakhansila akunhlanganiso ephethe umdlalo wenguqu kuleli azakuthi gwaqa eHarare lapho akhangelelwe ukuthi avotele umongameli wenhlanganiso, umsekeli wakhe lamalunga ebhodi.
Ngokwesisekelo sombuso weZifa esitsha, iqula leziphathamandla lizakuba lamalunga alitshumi lanye, umongameli labasekeli ababili, oyedwa wabo okumele kube ngowesifazana, lamalunga ayisitshiyagalombili, ayisithupha azavotelwa. I-Premier Soccer League kunye leligi yabesifazane ngamunye bazakhetha ilunga elilodwa ukuze kufike itshumi lanye.
Kuzo zonke izikhundla ezikhona, ezitshisayo njalo ezisemlonyeni yabalandeli bebhola likanobhutshuzwayo kuleli ngezikamkhokheli lomsekeli wakhe.
Amehlo athe nhlo kulabo abancintisa kusikhundla sokuba ngumsekeli kamkhokheli. Kulabathathu abadabuka emhlubulweni ongezansi yelizwe uKennedy Ndebele, Peter Dube lo-Omega Sibanda. Abanye abaphuma kwezinye indawo elizweni abafuna ukuba kulesi isikhundla nguJames Takavada loFrancis Nyamutsamba.
Amadoda akoBulawayo, womathathu la alodumo lenhlonipho engathandabuzwayo kumdlalo wenguqu kuleli. Kumbali yabo emdlalweni, sebephathe izikhundla zaphezulu ngakho kukhangelelwe ukuthi balethe umncintiswano onzima ngoMgqibelo.
UNdebele ubengumaqhuzu wenhlanganiso yePSL, uDube lilunga lebhodi yeHighlanders njalo wake wabangumgcinisihlalo weHighlanders lePSL, uSibanda wayengumsekeli weZifa.
Kuliviki intatheli yeZimpapers Sports Hub ikhulume lamadoda la, wonke ahlala koBulawayo, aveze imbono emumuthwe kumkhankaso wawo.
UNdebele ufunge wagomela ukuthi uzalungisa inkinga ezikulumdlalo eminyakeni engu-15 edluleyo nxa engavotelwa esikhundleni.
Uthe uyawuqondisisa umsebenzi wokuba ngumsekeli kamkhokheli lokubaluleka kwawo, okubalisela ukuhlanganisa ukubunjwa kwenhlelo, ukuhlela amacebo lemibono kanye lokumela isithunzi senhlanganiso.
“Umsekeli kamkhokheli kumele abe lolwazi olujulileyo ngokusebenza kwe-FA kungatsha zonke ezehlukeneyo njalo kumele abekusimo sokuthi uyenelisa ukuthi aqondise njalo anike amandla lomqondo wokuthuthukisa inhlanganiso. Umsekeli kamkhokheli kumele asebenze ndawonye lomkhokheli wakhe. Kuminyaka elitshumi lanhlanu edluleyo, inguqu yakuleli ibelenkinga ezinengi.
“Umkhuhlane weCovid-19 lokujeziswa kweZifa yiFifa kwengeza ukungcola lokhu, kwatshiya umdlalo udinga ukuguqulwa endaweni ezinengi. Kumele sigezise ingcekeza le.
“Kubalulekile ukuqaphela isidingo lesi lokuthi sizimisele ekutshintsheni ukwenza kuzo zonke ingatsha zomdlalo wethu,” kutsho uNdebele.
Umkhankaso wakhe wakhelwe phezu kwezinsika ezilitshumi lanye ezigxile ekuhleleni inguqu kakutsha, ekubuseni, ekuthuthukisweni kwamathalenta, ukunikwa kwamachence kumaqembu, ukuhlukaniswa kwemisebenzi kuzo zonke izigaba, ukuphakanyiswa kwebhola labesifazane, ukuqiniswa kwemiqondo ehlangeneyo, ukuxhumana, ukumaketha lokuthuthukisa ukuphatheka emncintiswaneni.
UNdebele uphethe ulwazi olunengi oluvela kubukhokheli endaweni ezitshiyeneyo kwezebhola likanobhutshuzwayo. Uke wasebenza njengonobhala kanye lomgcinisihlalo weHighlanders, njalo waba ngumxhumanisi wemidlalo yeCosafa ka2009. Uphinde wasebenza njengomqondisi wezokuthengisa kumidlalo yeAfrican Union Sports Council Region Five eyaqoqwa yiZimbabwe eminyakeni embalwa edluleyo.
USibanda uthe okwakhe yikuthi avotelwe ukuyaqeda umsebenzi awutshiya ngesikhathi esasekuZifa.
“Ngifuna ukuyaqeda umsebenzi engawuqalayo, yikho okungifuqayo ukuthi ngizimisele ukulandela isisekelo sombuso, ngiqinisekise ukuthi abaphathi basebenza bengahlutshwa kumbe kungela okubanqabelayo kuzo zonke ingatsha. Kuyikuzimisela ekuthuthukiseni isiko lobuqotho phakathi kwenhlanganiso. Ngizaqinisekisa ukuthi sisungula ikhomithi ezaphatha imali kunye lokumaketha lokuthi sixhumane kuwo wonke amazinga loHulumende, amankampani, iSport and Recreation Commission (SRC) kunye lezinye ingatsha ezisekela umdlalo wethu ukuze iZifa yenelise ukudonsa lokuhuga usekelo lwemali.
“Ngizaphinda ngisebenzele ukusungula ikhomithi lokuqapha elizahlola zonke inhlelo zeZifa liphinde liqinisekise ukuphendula lokusetshenziswa kwezinqumo. Ibhola lakulezinsuku seliyibhizimusi, futhi iZifa ngeke iqhubeke isalela emuva. Nxa iZifa isiqhutshwa ngendlela yebhizimusi kuzakuba lenzuzo yemali kubadlali, abaqeqetshi kanye labonompembe, ibuyele emaqenjini lama-academy kuwo wonke amazinga,” kutsho uSibanda.
Uqhubeke wathi: “Lokhu kuzaletha impumelelo emaqenjini labesilisa, abesifazane, amaqembu amancane, izikolo, iBeach Soccer, Area Zones, Five A Side, onompempe, abaqeqetshi lamakolitshi. Iholo kumaqembu esizwe abesifazane lalo kumele libekwe phambili.”
UDube uthe ufuna ukuthi avotelwe ukuze abelusizo emdlalweni. Okwakhe yikufika asekele umbono wenhlanganiso.
“Ngifuna ukungena kulihofisi kamsekeli kamkhokheli weZifa ngisebenze ukuze kuphakanyiswe umdlalo. Kubukeka njenge muli yebhola siyazi ukuthi yini okumele yenziwe kodwa asifuni ukuyenza. Ngibone ama-manifestos aphefumulayo okutsho ukuthi siyazazi izibopho esilazo. IZifa ilesisekelo sombuso njalo njengomkhokheli kumele ngisekele umbono wenhlanganiso kanye lomkhokheli. Ubukhokheli obulombono kanye lokugcina isimilo esihle yikho okudingekayo. Ukwephula imithetho, ukulwa sodwa kanye lokumiswa kwabantu akulunganga,” kutsho uDube.
Ugcizelele wathi: “Kuzafuneka ukuthi kuhlonitshwe isisekelo seZifa, kulandelwe imithetho lokuhlonipha zonke ingatsha kungakhathalekile ukuthi libhola labesilisa, abesifazane, ibhola elikumazinga aphansi kumbe ibeach soccer loba iFive-A-Side. Zonke ingatsha zidinga yonke inhlonipho efaneleyo njalo zinikezwe imali ezizifaneleyo. Zonke ingatsha kumele zikhule, zisekelwe.”
