Siphakeme .Mnindwa
Ukukhuliswa kwabantwana
Imidlalo yabantwana
Minengi imidlalo eyayidlalwa ngabasakhulayo. Imidlalo le kuthiwa yayiphathisa ekufundeni ukukhuluma kuhle ikakhulu amabala ahlupha ukubiza njengamabala alabo QX labo C.
Kwakukhona imidlalo yokuqinisa imizimba leminye njalo eyayikhaliphisa ingqondo ngendlela ezitshiyeneyo. Nansi eminye imidlalo okuthiwa yayiphathiswa ngabantwana:
Bantwana bantwana wozani ekhaya: Lo kuthiwa wawudlalwa abantwana bendawonye. Kwakukhethwa ababili kumbe abathathu kuthiwe yizilwane. Ababili kwakuthiwa ngumama lobaba. Ubaba wayesima ekucineni kweguma umama laye wayesiyakuma kwelinye icele.
Izilwane zazicatsha phakathi laphakathi kweguma. Abantwana bona babeqalisa bekwelinye icele leguma lapho okulomunye umzali khona. Lowana umzali oseceleni elingelabantwana wayebiza ethi:
“Bantwana bantwana wozan’ ekhaya! Bantwana, bantwana wozan’ ekhaya! Abantwana babephendula bethi: “Siyesaba!” Yena umzali wayesithi: “Lesabani?” Bona bathi: “Izilwane!” Yena umzali athi: “Izilwane kudala zafa zaphela.”
Wayethi esitsho njalo umzali, basuke abantwana sebegijima beqonde ekhaya. Izilwane lazo ziqaphe endleleni. Bazakuthi bayedlula lapho ezicatshe khona zeqe zizame ukubabamba. Lowo obanjiweyo wayephenduka abeyisilwane, abanye benelise ukwedlula bayefika ekhaya.
Lowana umzali osele ngale laye uzamemeza njalo athi kabeze ekhaya basuke njalo benze esakuqala. Injongo kwakuyikuthi kubonakale intshantshu ezizasala zingabanjwanga yizilwane.
Amasiko lemikhuba yamaNdebele
Umacatshelana: Babewudlala behlangene abantwana. Kusuke ababili bahambe bayecatsha, laba abasele ngapha babebiza bethi: “Sibuye? Sibuye na? Abacatshileyo babevuma kodwa bekwenza ngonanzelelo ukuthi bengaze bezwa kuhle lapho abacatshe khona.
Bengadinga badinge bengabatholi baqale bathi: “Tshayani umlozwi!” Babe tshaya labo ababecatshile kodwa bangehluleka ukubavumbulula babecina bethe: “Sesehlulekile velani”.
Ukulibhana: Lo ngumdlalo owawudlalwa kwenziwe amaqembu amabili. Phela iqembu linye ngalinye lalifuna ukubona ukuthi elinye lihlakaniphile ukwedlula lona na. Kwakulijwana ngezinto zonke nje, ezekhaya, ezegangeni, emasimini njalonjalo.
Nanka amanye amalibho okwenza umzekeliso nje: Ngikulibha ngenkunzi yami egwaza iqethukile. Impendulo yinkunzane. Ngikuliba ngafana bami ababona abanye kodwa bona bengaziboni. Impendulo ngamehlo.
Uqhubeka kanjalo umdlalo kuphiwana imiklomelo ukuze kubonakale ukuthi yiliphi iqembu elehlulwayo. Imidlalo besekweluseni: Loba ukwelusa kwakungumsebenzi wabafana, ayekhona amankazana ayeselusa.
Amankazana ayeselusa yilawo ayesuka lapho okwakungela bafana khona.Ekweluseni lapha yayikhona imidlalo eyayidlalwa ngabafana lamantombazana bendawonye. Omunye wale imidlalo eyayidlalwa ngabafana lamankazana bendawonye yikubhukutsha.
Sizaqhubeka sisuka lapha kusibanga esizayo.
