mbulelo smpofu
Amazilo
Ukufa kwesihambi
Ukufa akulamango njalo akula mango ongela thuna. Isihambi laso sasisifa. Isidumbu kwakuthiwa akufanelanga sichaphe umfula ngakho nxa isihambi sakhatshana sifele emzini kwakubikelwa abakibo bazesithatha nxa kwakungachatshwa mfula.
Nxa kuchatshwa umfula babengcwabela kulowo muzi afele kuwo. Kodwa kwakumele bekhiphe inhlawulo ethile. Kuthiwa babegezisa lowo muzi. Nxa kungumuntu ongaziwayo kwakubikelwana ngaye. Ofele emzini wakhe wayebikela awakibo amadlozi ngesenzakalo leso esiyabe sehlile,ukuze amvikele nxa kungaba lokubi okuzayo. Isihambi sasingcwatshwa bucwala lomuzi.
Ukufa kwephahla
Nxa kufe iphahla loba selilidala kanganani akufanelwanga kukhalwe kakhulu. Nxa lifile lise lincinyane akumelanga kukhalwe isililo. Laba abazekhulimisa abafelweyo nxa lingumfana babefika bethi “Hawu usibani eseyekwelusa” kukhulunywe kube yinto elula nje. Nxa kufe eliyinkazana kwakuthiwa “Hawu usibani useyekwenda.” Lakho kukhulunywa kube yinto elula kuze kuthi esesiya lahlwa kuqalwe kugeziswe ophilayo,amanzi ayechithelwa engcwabeni lofileyo, kuthiwe uphelekezela iphahla lakhe. Kuzakuthi iphahla elifileyo lingakafakwa engcwabeni kufakwe eliphilayo beselikhutshwa kuthiwe; “Nansi indlu yomkhula wakho, usuyibonile ungaze wamlandela, yena uzahlala yedwa lapha.”
Ngemva kwalokhu kuyangcwatshwa lelo elifileyo. Lokhu kuyenziwa loba amaphahla esekhulile.
Ukugezisa amakhuba
EsiNtwini ukufa kuthathwa njengento eletha u-mnyama ebantwini ngakho wonke umuntu ovela emfeni kumele ageziswe engakangeni emzini wakhe.
Ngokufanayo –ke, yonke impahla esetshenziswe ngesikhathi kulahlwa umuntu kumele iqale igeziswe umnyama lo abanikazi bengakayithathi.
Kuthi ke kungaphela amaviki amabili kumbe amathathu umufi esebekiwe kuthanjiswe amabele lapha ekhaya kuphekwe utshwala kuthiwe butshwala bamanzi. Abanye njalo bathi butshwala bokugezisa amakhuba. Kuzakuthi ngeviki yesi thathu buphekwe lobotshwala.
Mhla bunathwa kuzadingwa inyanga ezalungisa izihlahla zayo,kuthi ekuseni mhlalokho ithathe impahla yonke eyasetshenziswa mhla kungcwatshwa umufi iyibuthelele laphaya iyichele ngezihlahla zayo lezo. Abantu labo bafika ekuseni bezonatha utshwala lobu. Yiso isikhathi lapho abathatha khona impahla zabo lezo abazitshiya mhla womngcwabo.
Isiko leli lokhe lisaqhutshwa emakhaya –ezigabeni ezinengi zamaNdebele.Akumelanga kuphuzwe ukuphekwa utshwala bamanzi ngoba phela impahla le eyasetshenziswayo kumele ibuyele kubanikazi. Akufuneki ukuthi abanikazi bempahla baze beze bodwa bezecela impahla zabo ngoba sebefuna ukuzisebenzisa ngoba abafelwayo labo sebephuzile ukugezisa amakhuba.
shloboe boe
