Sinokubonga Nkala
Ugwalo lulotshwe nguTommy Matshakayile Ndlovu loDoris Nomathemba Ndlovu beloBekithemba Sodindwa Ncube
Ugwalo ludindwe yiMambo Press
Ukufa, ukungcwatshwa lokuzila
Nxa kufiwe ekhaya lapha indlela okwakuzilwa ngayo kwakusiya ngokuthi ngubani ofileyo. Nxa kufe ubaba umama wayezila ngale indlela: Okwakuqala yikho ukugelwa inwele zonke. Ngemva kwalokho wayethatha imisisi yakhe, yizigqoko zakhe lezo phela, ayigqoke eyiphendulele ethethe okwangaphakathi wakusa phandle. Kwasekuzathathwa ibhetshu likababa, umkakhe phela, kusikwe kulo uzwezwe. Uzwezwe lolo uzabopha ngalo ebusweni abhodise ikhanda.
Kuzakuthi nxa egeza angaze agcoba ngamagcobo, ahlale emhlophe nke kukhanya ukuthi ngumuntu ohluphekileyo. Uzahlala enje-ke umfelokazi aze aguquke kulesi simo mhla umkakhe esebuyisiwe.
Umuntu uze abuyiswe sekuphele umnyaka. Ngalesi sikhathi umfelokazi esazilile wayengavunyelwa ukuhlangana lesilisa. Kwakumele azile indoda umkakhe aze abuyiswe. Lokwethekela indawo wayengavunyelwa.
Nxa kufe umfazi, indoda yona yayizila kanje: Ezandleni lenyaweni yayigqiza intambo ezelukwe ngemizi. Ekhanda lapha yayibopha ngozwezwe lwesikhumba esingelaboya. Layo kwakumele izile ukuhlangana lowesifazana okwesikhathi eside, ibisigezisa abanye abafazi bayo layo izigezise. Ngemva kwalokho yayibakhunga ngezipho ezifana labonkukhu kumbe ombuzi. Ngemva kwalokhu-ke indoda yayisilungele ukungena ezindlini zabafazi bayo laba.
Loba indoda yayizila kanje okwayo abantu babengakuqapheli kakhulu okunjengokomfazi. Kweminye imizi abantu bonke balapha ekhaya okufiwe khona babegelwa inwele zonke ngemuva kokungcwatshwa komufi. Konke lokhu sekwenziwe sekuzaqoqwa zonke impahla zomufi zifakwe kweyinye indlu lapho ezazizahlala khona zizezilungiswe ngemva kombuyiso. Nxa kungubaba ofileyo, lezifuyo lapha ekhaya, inkomo phela, zazingathengiswa umbuyiso ungakenziwa. Ngelanga lesibili ngemva komngcwabo kwakudingwa inyanga ichele abantu balapha ekhaya ibagezise umnyama.
Ngemva kwalokho basebezakudla inkubalo. Inkubalo yinyama edliwa ihlanganiswe lomuthi othile. Injongo yokudla inkubalo ngeyokuthi izihlobo zomufi zidele ukuthi ngempela leso sihlobo sazo kazisoze zisibone futhi. Umuthi lo wawudliwa utshiyelwana kuthi labo abayabe bengekho mhlalokho bathi mhla befika beze esililweni bafike bayiphiwe inkubalo labo badelise inhliziyo zabo. Ukuze inkubalo igcinwe okwesikhathi eside yayisomiswa ibe isibekwa yomisiwe.
Ingagcinwa kuze kuphele umnyaka. Phela esiNtwini kuthiwa umuntu ulakho ukuyakhalela abantu loba sekuphele isikhathi eside kangako. Sima lapha lamhlanje, sizaqala ngokubikwa kwemfa lokukhalelana.
shloboe boe
