shloboe boe
Nkosilathi Sibanda
ABANTWANA besiqintini seMguza, eMatabeleland North sebephiwe ithuba lokuthola imfundo yohlonzi nanko enye yamankampani akubhizimusi lezikolo, i-ACT’V Group of Schools isiseduzane lokuvula isikolo esakhiwe ngobuciko obuphezulu kulindawo.
Isikolo lesi, iVictory Junior School, sisendaweni ebizwa ngokuthi yi-King’s City, ngaphansi kweMguza Rural District Council, njalo kukhangelelwe ukuthi sisekele inhloso kaHulumende yokusabalalisa imfundo yohlonzi kuzo zonke izigaba.
Lezi zindaba ezimnandi kumphakathi walindawo nanko kulabafundi abahamba imango emide besiya ezikolo, obekudala ukuthi abanye babo bekhathale masinyane, bekhalale izifundo. Abafundi abangamantombazana bahlezi besengozini yokudlwengulwa ngenxa yokufunda khatshana.
Ngokuvulwa kwesikolo esitsha, kukhangelelwe ukuthi impilo iguquke empilweni zabantwana besikolo kulindawo.
Umsebenzi wokwakha isikolo uqale ekuqaleni kuka-2024. Inkampani ye-ACT’V iqinisekise ukuthi sebelungele ukusivula ukuze banikeze abafundi amathuba okuguqula ikusasa.
Umqondisi wenhlelo ku-ACT’V uMnumzana Themba Ndwalaza uthe isikolo sabo sizaphakamisa ezemfundo eMguza lokuqinisa injongo kaHulumende yokuthi amankampani azimele wodwa kumele asekele ukwakhiwa kwezikolo.
“Le yingqubekela phambili ezaphathisa kakhulu ekuqeqetsheni abantwana abazakhula babe yizizalwane ezithobekileyo, ezikhaliphileyo, ezizimisele ukusebenzela ilizwe. Isikolo lesi sakhelwa ukuthi sibonise ukuzimisela kwethu ukuthi siphakamise ezemfundo, njengalokho okufunwa nguHulumende wethu. Sihlose ukuletha imfundo yohlonzi ebantwini.
“Sibambane lamabhanga abalisa ele-FBC Bank, okuyiwo aphathise kakhulu ekwakheni. Saqala ngo-2024 ukwakha, sijonge ukuthi siqede masinyane ngoMpandula kodwa sehlulwa ngokuthize ukuthi siqede ngaleso isikhathi. Kodwa, silokuthaba ukulazisa ukuthi sisesikhathini lapho esisanxusa khona labo abafuna ukubhalisa ukuba ngabafundi e-Victory Junior School njengoba sisalindele imvumo yeziphathimandla,” kutsho uNdwalaza.
Uthe babonga ukubambana okukhona phakathi kwe-ACT’V logatsha lwe-Primary and Secondary Education kuHulumende kunye leMguza Rural District Council.
Uncome usekelo abaluthole kuMguza Rural District Council, ngokubanikeza izicebiso ezivela kubo manjinela bekhansili.
“Njengenkampani yezikolo, eqhuba inhlelo zayo mgceke, sikhuthalele ekuxhumaneni kakuhle lengatsha esisebenzisana lazo. Sibonga ukubambana esilakho logatsha lwe- Primary and Secondary Education, ikhansili labazali.
“Ikhansili yeMguza yasiphathisa ngezisebenzi zayo ezazihlola isakhiwo sethu, ziqinisekisa ukuthi konke kwenziwa ngendlela. Siyakubongela lokhu. Saxhaswa yi-FBC Bank eyancoma ukuqhutshwa komsebenzi.”
Kusenjalo, i-ACT’V isithole inhlonipho ngokuphumelela kwabafundi bayo kumihloliso yeZimbabwe Schools Examinations Council (Zimsec).
Inkampani le yiyo njalo elezikolo ezigoqela i-Angels Primary, Tshebetshebe Elementary, Cana Primary School le-V Mhlophe High School, ezikoBulawayo. Kuminyaka edluleyo, zonke lezi izikolo bezifikisa isilinganiso esiphakathi kwe-98 phesenti kusiya ku-100 phesenti, kumpumela yemihloliso ye-Zimsec.
UNdwalaza uthe izikolo zabo zilandela uhlelo lukaHulumende olwe-Education 5.0.
“Sihlose ukusungula imfundo yohlonzi, ekuzinga eliphezulu. Umbono wethu uchaza ukuthi kusiyafika umnyaka ka-2025, i-ACT’V Group of Schools kumele yaziwe emhlabeni wonke ngokuphawula imfundo.”
mbulelo smpofu
