Siphakeme .Mnindwa
Brandon Moyo
IQEMBU lenguqu elisanda kukhuphukela kuZifa Central Region Division One, iMawabeni FC, libika ukuba kalitshiyi lutho ukuqinisekisa ukuthi lilabadlali bohlonzi lonyaka.
Iqembu leli, elidabuka eMawabeni, esabelweni seMatabeleland South, elidume ngelithi “Amawab’amahle” libika ukuba lizaqhuba uhlelo lokudinga abadlali ngesivivinyo kulimpelaviki, ngenhloso yokuqinisa iqembu.
Libike ukuba imidlalo yokukhetha abadlali abatsha izaqhutshelwa enkundleni yeMawabeni Ground ngoMgqibelo langeSonto kusukela ngehola letshumi ekuseni kusiya fika ihola lesine ntambama.
Abadlali kumele balethe izithupha zabo zokuzalwa kumbe iphasipoti.
Umgcinisihlalo weMawabeni FC, uMpumelelo “Mbesuma” Nkomazana, uthe bafuna ukungena isizini le ngesivivinyo ngokuqinisa iqembu ngaphambi kokuqala kwesizini ka-2025.
“Ibhola likaDivision One akusilona elabantwana. Kuzaba nzima njalo kudinga iqembu eliqinileyo. Ngenxa yalokho, sizabe sisingathe izivivinyo zokuqinisekisa ukuthi siqinisa iqembu lethu njengoba silungiselela u-Division One. Sidinga abadlali abalethalenta.
“Sinxusa bonke abadlali abasacathula, abafisa ukuba yingxenye yethu. Sifuna ukwenza imbali, sibe liqembu lakuqala eliphuma kulindawo elizangena kuPremier League,” kutsho uNkomazana.
Iqembu leMawabeni FC likhuphukele kuCentral Region Division One League ngemva kokuphuma lisendaweni yesibili kuligi yeZifa Matabeleland South Division Two.
IMawabeni FC esungulwe ngo-2019 izimisele ukulandela ezinyathelweni zeStars United ephuma esiqintini esifanayo eyadlala ku-Division One, ngo-1990.
UNkomazana uthe balokuthaba ekuthini ukusebenza gadalala abakwenzayo sekubhadala. —@brandon_malvin
