mbulelo smpofu
Bhekimpilo Tshalibe
ICANSI Fashion Festival okungumbukiso wezefashini itshengisele ukuthi ilakho ukukhula ngendlela emangalisayo nanko phela lonyaka bekungabukiswa impahla kuphela kodwa bekulemidwebo etshiyeneyo kanye lokudla kwesintu. Injongo yalumbukiso lonyaka ibiyikukhangisa lokuthakazelela ezamasiko kanye lefashini.
Intatheli ikhulume lo co-founder we-Icansi fest uPenelope Lacha oveze ukujabula kakhulu ngalumcimbi.
“Ngiyajabula kakhulu nge-festival le okungokwesibili siyenza lapha koNuthu. Injongo yalumbukiso lonyaka ibingeyokuthakazelela kanye lokubukisa ezefashini, imidwebo, ukudla kwesintu kanye labahlabeleli,” kutsho uNkszn Lacha.
UNkosazana Silenkosi Moyo ongu-Regional Director weNational Art Gallery of Zimbabwe uthe imicimbi efana lale ibalulekile kakhulu ngoba inikeza abaphatheka kwezama-arts inkundla zokusebenzela.
“Ngithanda ukubonga ama-designers ngokwenza umcimbi onje osekela amasiko ethu kusetshenziswa ifashion le-art,” kutsho uNkszn Moyo.
Uthe abama-arts bangaqhubeka besenzenje bazakuya khatshana ngomsebenzi wabo.
“Singaqhubeka sibambene njalo sisekelana kuhlangothi lwama-arts sizakuya khatshana ngemisebenzi yethu etshiyeneyo,” kutsho uNkszn Moyo.
UNkosazana Sikhululekile Moyo onguKhansila kaWard 17 okade emele uSodolobho wakoBulawayo uthe idolobho lizimisele ukusebenza labo bonke abazimisele ukuthuthukisa ezamasiko.
“Umcimbi lo uzaletha inzuzo emangalisayo emnothweni wakoBulawayo njalo lokhu kulethela abantu ukudla kwamehlo njalo lokuthi bejabulele isiko labo besebenzisa ifashini,” kuphetha uNkosazana Moyo.
Lumcimbi ubulemibukiso etshiyeneyo kugoqela abatayilayo bebukisa impahla ezithungwa ngama-designers atshiyeneyo, abemidwebo labo bebebukisa abakudwebayo kuthi abanye labo bebebukise ukudla kwesintu.
