Sinokubonga Nkala
Bhekimpilo Tshalibe
INGCITSHI kwezokulima sezixwayise abalimi ukuthi kulesi isigaba sokulima belime imbhida yohlobo lwe-tsunga bazitshayele imali emangalisayo.
UMnumzana Edward Chikwaya Ongu-Agricultural Extension Officer kunhlanganiso yeZimbabwe Development Democracy Trust (ZDDT) ukhuthaze abalimi ukuthi balime imbhida yohlobo lwe-tsunga bezitshayele imali.
Uthe itsunga kayihluphi ukulima njalo ilomunye umhlobo obizwa ngokuthi yi-mustard tsunga.
“I-tsunga kayihluphi ukulima njalo sikhuthaza abalimi ukuthi nxa behlanyela umhlobo we-mustard tsunga ukuthi beqale bafake umquba wenkukhu kumbe owenkomo engadini zabo behlanganise lomhlabathi.
“Abalimi kumele bafake utshani ezivandeni zabo amaxhakela engakahlumi,” kutsho uMnu Chikwaya.
Uqhubekele phambili esithi i-tsunga ithatha amalanga angu-7 ukuthi ihlume.
“Ngemva kwamalanga angu-3 kusiya ku-4 sikhuthaza abalimi ukuthi besuse utshani abayabe bebufake engadini njengoba itsunga ihluma ngemva kwamalanga angu-7.
“Ngemva kwalokho umlimi uyabe esekhangelelwe ukuthi agxumeke usaba ngehola lika 5 ntambama ukwenzela ukuthi amaxhakela engaphanjaniswa lilanga.
“Ngemva kwamaviki amabili umlimi egxumeke amaxhakela akhe sengaqalisa ukukha imbhida yakhe,” kutsho uMnu Chikwaya.
Uthe itsunga ilemikhuhlane lezibungu ezinlutshwana njalo ukhuthaza abalimi ukuthi bayifafaze.
“I-tsunga ihlutshwa yizibungu ezidla amahlamvu njalo sikhuthaza abalimi ukuthi beyifafaze besebenzisa umuthi okuthiwa yi-Cabaryl 5 percent dust,” kuphetha uMnu Chikwaya.
shloboe boe
