Siphakeme .Mnindwa
Bhekimpilo Tshalibe
INGCITSHI kwezokulima sezixwayise abalimi ukuthi kulesisigaba sokulima balime i-beetroot ngoba iyengeza imali esikhwameni.
UNkosikazi Siphiwe Ndebele ongu-Acting District Agricultural Extension Officer eMguza District ukhuthaze abalimi ukuthi balime i-beetroot ngoba iyengeza imali esikhwameni. Uthe i-beetroot kayihluphi ukulima.
“I-beetroot kayihluphi ukulima njalo ilinywa umnyaka wonke uze uyephela. I-beetroot ilomhlobo okuthiwa yi-detroid dark red,” kutsho uNkkz Ndebele.
Uqhubekele phambili esithi i-beetroot ilinyelwa emhlabathini ongekho manzi kakhulu.
“Sikhuthaza abalimi ukuthi balimele Ii-beetroot yabo kuma well drained soils alomquba. Okunye njalo umhlabathi okulinyelwa khona mele ube le ph eyi 5,6 kusiya ku-6,6,” kutsho uNkkz Ndebele.
Uthe ukhuthaza abalimi ukuthi bangalimi i-beetroot endaweni elelanga kakhulu. “Sikhuthaza abalimi ukuthi balimele i-beetroot endaweni elomthunzi,” kutsho uNkkz Ndebele.
Uthe ukhuthaza abalimi ukuthi nxa sebehlanyela inhlanyelo yabo bevule imizila.
“Sikhuthaza abalimi ukuthi nxa sebehlanyela begebhe amagodi ayi 1,2 kusiya ku-2cm njalo bevule imizila eyi 8 kusiya ku-10cm ukwenzela ukuthi izilimo zabo zingakhuli ziminyene,” kutsho uNkkz Ndebele.
Uthe i-beetroot kayiphuzi ukuhluma.
“I-beetroot ithatha amalanga angu-7 ukuze imile njalo ithatha amalanga angu-70 kusiya ku-110 ukuze ivuthwe,” kutsho uNkkz Ndebele.
Uthe i-beetroot ilezibungu ezinengi njalo ukhuthaza abalimi ukuthi beyifafaze.
“I-beetroot ivame ukuhlaselwa yizibungu ezigoqela ama-aphids, cutworms, nematodes kanye lama-flea beettles njalo sikhuthaza abalimi ukuthi befafaze besebenzisa umuthi okuthiwa yiMaliathon kanye le-lambda cyhalothin,” kuphetha uNkkz Ndebele.
