Baphindela emzileni koBulawayo

Innocent Kurira

INHLANGANISO ephethe umdlalo wokugijima eye-Bulawayo Athletics Board (Bab) ikhangelelwe ukwethula uhlelo lwayo lwemincintiswano yokugijima ka-2025 ngokuqhuba umjaho mhlaka 8 Nhlolanja enkundleni yeWhite City.

Abantu banxuswa ukuba babhalise ukuphatheka kumincintiswano le ezagoqela ukugijima kumabanga aphakathi ama-track and field, relay, hurdles leminye. Kubikwa kuzaqhutshwa lumncintiswano wokudinga abagijimi abazafinyelela i-ZITF Coca-Cola 4-minute Mile.

I-ZITF Coca-Cola 4-minute Mile izakuba khona ngoMabasa, ngoMgqibelo wokuvalwa kombukiso wamabhizimusi.

Inhlanganiso ye-Bab, kumbiko wayo wekhalenda yalonyaka ithe kumncintiswano womhlaka 8 Mbimbitho, labo abafuna ukuncintisa kumele babhadale i-US$2 kuma-cadets labasakhulayo. Abadala bazabhadala i-US$3, amaqembu e-relay azakhipha i-US$5. Ngokutsho komgcinisihlalo weBab, uWatson Madanyika, kunxuswe wonke umuntu ozizwa elentshukuntshu yemidlalo yokugijima.

“Lo ngumncintiswano wakuqala owe-track and field. Silokujabula ukuthi siphakathi kokuqoqa lokhu ekuqaleni komnyaka omutsha. Sinxusa wonke umuntu, amakilabhu, amakolitshi, amanyuvesi lezikolo ukuthi zibhalise ukuncintisa. Utshele intatheli ukuthi umncintiswano kaMbimbitho lo uzasetshenziswa ngabantwana bezikolo njengenkundla yokulolongela imincintiswano yeNational Association of Primary Heads (Naph) leNational Association of Secondary Heads (Nash).

“Labaqeqetshi bazathola ithuba lokuhlola ukuqina kwabagijimi babo, phambi kokuba bayencintisa kuma-African Games lwezinye inkundla kwamanye amazwe. “Uthe kubaluleke kakhulu ukuthi baphakamise ithalenta labasakhulayo.

“Kumele sisekele abasakhulayo, sibanikeze usizo olufunekayo kunye losekelo oluzabanceda ukuthi bafinyelele ezingeni eliphezulu. Ngokwenza lokhu sizabona ukuthi imidlalo yokugijima koBulawayo iqhubekela phambili njalo iveza abadlali abalamathalenta abangancintisa izwelonke lasenkundleni yamazwe.”

Phambili kokuba kuqhutshwe imincintiswano ye-track and field iBab izabe ilomncintiswano we-Cross Country Championships mhlaka 26 Zibandlela, eNketa Drive Park, eselokitshini leMpopoma.