Online Reporter
Liberty Dube
VARUME vaviri — Forget Mutepfa (35) naGreater Mateta (29) — parizvino vari muhusungwa vachimirira kutongwa vachipomerwa mhosva yekurova nekucheka rurimi rwaHonest Tokodo (31) wekuBurma Valley munaMbudzi gore radarika.
Vasungwa ava vanonzi vakabata Tokodo ndokucheka rurimi rwake uye vakazotiza nechidimbu charwo izvo zvinofungidzirwa kuti zvine chekuita nemabasa ehurombwa.
Mutepfa naMateta vakapedza zororo rese reKisimusi vari muhusungwa.
Munguva pfupi yadarika, vakamiswa pamberi pemutongi wedare reMutare Magistrates Court, VaXavier Chipato, vachipomerwa mhosva yekurova sezvinotsanangurwa muchikamu cheSection 89 (1) (a) chemutemo weCriminal Law (Codification and Reform) Act, Chapter 9:23.
Vaviri ava vakanzi vadzoke kudare munguva pfupi iri kutevera.
Tokodo akapona nepaburi retsono mushure mekurwiswa zvakaipisisa nevanhu vana (4), vaviri vacho vasingazivikanwe.
Vasungwa ava vaipomera Tokodo mhosva yekudanana neaimbove shamwarikadzi yemumwe wavo.
Tokodo akange ambotandara nevasungwa ava paChitakatira Business Centre apo vakazomubatirana mushure meawa rimwechete ndokumucheka rurimi.
Chinoshamisa ndechekuti vasungwa ava havana kuba zvinhu zvaTokodo, kusanganisira nharembozha yaakanga akabata.
Dare rakanzwa kuti nomusi wa20 Mbudzi 2024 nenguva dza10 manheru, vasungwa vaviri ava, vachiperekedzwa nevamwe vavo vaviri kupomerwa mhosva, vakatevera Tokodo paakabva paChitakatira Business Centre.
Mutepfa akapomera Tokodo mhosva yekudanana neaimbove shamwarikadzi yaMateta.
Mutepfa akazobata maoko aTokodo apo mumwe wavo akashandisa chinhu chisina kuzivikanwa kumucheka rurimi.
Tokodo akachekwa rurimi zvakaipisisa zvakaita kuti azomhanyiswa kuVictoria Chitepo Provincial Hospital.
Zvichakadaro, Tokodo akatsanangura nhoroondo yekukuvara kwake pamwe nekupora svondo rino.
Akatenda varapi nemhuri yake yese yakamubatsira panguva yakaoma kudai.
“Ndiri kupora nokukurumidza uye ndiri kufambira mberi zvakatsiga zuva nezuva. Mushonga wacho wave kushanda uye ndiri kunzwa zviri nani nekufamba kwenguva. Ndinotenda rutsigiro kubva kuchikwata chevarapi, mhuri neshamwari, avo vakabatsira zvakanyanya mukupora kwangu,” anodaro.
Kunyange zvazvo Tokodo asati anyatsopora, ava kukwanisa kutaura zvakanaka.
Zvisinei, anoramba achinetseka pamusoro pekukwanisa kushandisa rurimi rwake.
“Ndinotarisira kushandisa zvakare rurimi rwangu, asi handizivi kuti zvichaitika rinhi uye kana zvichizoitika. Chishuwo chemwoyo wangu kuti zvidzokere pekare,” anodaro Kokota.
