Online Reporter
Kingstone Mapupu
MAKORORO maviri — ayo anogara kuEpworth — ange arura kuba motokari munzvimbo dzakasiyana dzenyika akasungwa nematikitivha eCriminal Investigations Department (CID) ekuchikamu chinoona nezvemotokari cheVehicle Theft Squad.
Mufaro Mupandira (29) naBrandon Chitiyo (21) vekuOverspill kuEpworth vakasungwa nekuda kwemhosva nhatu dzekubiwa kwemotokari.
Detective Inspector Rachel Muteweri vanova mutauriri wematikitivha eCID vanoti nemusi wa21 Zvita nenguva dza10 mangwanani, vaviri ava vanonzi vakaenda kune mumwe murume aiva nemotokari yake panzvimbo yemabhizimisi yeMurisa kuChitungwiza ndokumuhaya kuenda kwaBesa kwaSeke apo vakazomutorera motokari iyi yerudzi rweHonda Fit.
“Zuva racho raitevera, vaviri ava vakaenda kuDomboshava uko vakanobira mumwe murume zvakare motokari yake yerudzi rweHonda Fit. Muridzi wemotokari iyi anoita basa remushika-shika nekudaro akatakura vanhu, kusanganisira nevaviri ava, panzvimbo yemabhizimisi yeChirodzero kuDomboshava, vamwe vose vakaburuka mumota iyi ndokusara varume vaviri ava,” vanodaro Det Insp Muteweri.
Vanoti makororo maviri aya vakazorwisa muridzi wemotokari iyi vachibva vamukurira ndokumuvharira mubhuti remotokari yake vakamusunga ndokutyaira vakananga kupurazi reChabwino nekwaJuru uko vakazonomukanda mumunda wechibage vachibva vaenda nemotokari yake.
“Vachishandisa nzira dzimwechete dzekuba motokari idzi, vaviri ava vakazonobira mumwe murume motokari yake yeMazda Familia nemusi wa29 Zvita kuBeatrice. Vakazoonekwa nemichina yekuongorora motokari dzabiwa yetracking system muHarare apo vaiva nemotokari yakabiwa vakatanga kudzingirirwa nematikitivha apo vakabva vasungwa,” vanodaro Det Insp Muteweri.
Vanoti vaviri ava vakapinda mudare kekutanga apo dzimwe mhosva dzavari kupomerwa dziri kufambira mberi nekuferefetwa.
“Semapurisa eZimbabwe Republic Police (ZRP), tinokurudzira varidzi vedzimotokari kuisa michina inotaridza kune motokari dzavo uyewo kuti vasatakure vanhu pose-pose, zvikuru vanhu vavasingazive, nekuti kubiwa kwemotokari kuri kukwira zuva nezuva,” vanodaro Det Insp Muteweri.
Abel Ndooka
){kind=link}
