Online Reporter
Kingstone Mapupu
MAKORORO maviri akasungwa uye mumwe wacho ndokutiza kwaChilonga, kuChiredzi nemhosva yekuba madhongi 70, ayo akazowanikwa, kunzvimbo dzakasiyana kudunhu reMasvingo.
Mutauriri wemapurisa kuMasvingo, Inspector Kudakwashe Dhewa, vanoti vakasungwa ndiThemba Mafanele (37) naRabson Mafanele (22) vemumusha waSabhuku Chihosi vekudunhu raMambo Chilonga.
Vaviri ava vari kupomerwa kuba madhongi kunzvimbo dzinoti Renco, Zaka nekuTriangle kuChiredzi.
“Nemusi wa15 Zvita, murume anonzi Aaron Foroma (64) wekuVillage 233 kuBuffalo Range kuTriangle akanomhan’ara kumapurisa kuti aiva abirwa madhongi ake manomwe nevanhu vaisazivikanwa izvo zvakaitika usiku. Runyerekupe rwakasvitswa kumapurisa rwakabva rwaita kuti vaviri ava vasungwe ndokubva pawanikwa madhongi gumi aiva kumba kwaGetrude Matamba. Mumwe ari kupomerwa nyaya yekuba madhongi iyi, Luckson Mandunduma, akabva atiza paakaona vamwe vake vasungwa,” vanodaro Insp Dhewa.
Vanoti madhongi manomwe pagumi akawanikwa akachengetwa nevarume ava, akabva azivikanwa naAaron Foroma kuti aiva ake.
Matamba akabuda pachena kuti varume vatatu ava vaigara vachiunza madhongi kumba kwake vachiti vaiatengesa ayo aisaziva kuti vaimawana kupi.
“Varume vaviri vakasungwa ava vakabatsira mapurisa kuwana mamwe madhongi makumi matanhatu, akazosvika makumi manomwe pamwechete ayo aiva akabiwa kuvanhu vakasiyana nechikwata ichi,” vanodaro Insp Dhewa.
Vasungwa ava vakachengetedzwa vachimirira kuendeswa kumatare edzimhosva nekuda kwemhosva yekuba madhongi uye pachitarisirwawo kuti pane dzimwe mhosva dzichanyuka kubva kwavari nekufamba kwenguva.
“Semapurisa, tiri kukumbira kuruzhinji kune vane mashoko ekuti tikwanise kusunga Luckson Ndunduma wekwaSabhuku Chihosi kwaMambo Chilonga kuChiredzi kuti vatizivise. Vanogona kuridza nhare panhamba dzeProvincial Operations Landline dzinoti 0392266778 dzekuMasvingo, dzeWhatsApp 0775 996 945 dzekuTriangle kana 0312336511 uye kuzivisa mapurisa ari padyo navo,” vanodaro Insp Dhewa.
Vakarumbidza veruzhinji nekudyidzana kwakanaka kwavari kuita nemapurisa pakunyevera kuparwa kwemhosva dzakasiyana mudunhu iri izvo zviri kuita kuti nhubu idzi dzisungwe uye nekuwanikwa kwezvinenge zvabiwa.
“Tinokurudzira vanhu kuti vatevedze mitemo yakatarwa kana munhu achida kutinha kana kubvisa zvipfuyo kune imwe nzvimbo achiendesa kumwe, ngavaende kubazi reDepartment of Veterinary Services kana kumapurisa vobatsirwa nemagwaro anodiwa,” vanodaro Insp Dhewa.
daniel chigunwe
