Kushanda nesimba kwabhadhara: Musona

Abel Ndooka

SOCCER Star of the Year – Walter Musona – anoti kushanda nesimba uye kuzvininipisa ndiko kwakamubatsira kuhwina mubairo mukuru uyu kechipiri gore rino.

Musona, uyo akatungamira chikwata cheSimba Bhora kuhwina mukombe weCastle Premier Soccer League mwaka wenhabvu uchangodarika, ndiye akahwina mubairo weSoccer Star of the Year pamabiko akaitwa svondo radarika muHarare.

Akapedza ari pamberi pevamwe vatambi vanoti Lynoth Chikuhwa weHighlanders naKhama Billiat weYadah Stars.

Muhurukuro neKwayedza, Musona anoti kushanda nesimba kwaakaita mwaka wadarika ndiko kwakamubatsira kuhwina mubairo mukuru uyu kechipiri gore rino.

“Munhu ukashanda nesimba uye wakazvininipisa unowana mubairo mune remangwana,” anodaro Musona.

Anoenderera mberi achiti, “Mwaka wadarika, takatamba nhabvu zvainwisa mvura sechikwata uye taive takabatana izvo zvakaona tichihwina mubairo wePSL uye zvakazobatsirawo kuti ndisarudzwe kuve Soccer Star of the year.”  Gore rino, Musona akatamba nhabvu inonwisa mvura kuchikwata chake cheSimba Bhora nekuchikwata chemaWarriors izvo vazhinji vave kushuvira kuona achienda kunotambira kunze                                          kwenyika.

Anoti anoshuvira kutambirawo kunze kwenyika, hunge mukana wacho ukauya asi parizvino ari kutarisira kutamba nhabvu yake muno mwaka unotevera.

“Mutambi wese wenhabvu shuviro yake kutambira kunze kwenyika uye iniwo ndodawo kuzonotambira kunze kwenyika, hunge mukana ukamuka.

“Asi parizvino hapasati pave nechikwata chamborakidza kuti chinondida saka ndiri kungofunga hangu nezvekutamba muno mwaka unotevera, tichiona kuti panogona kuzoita chikwata chingade kuzoda kunditenga,” anodaro Musona.

Musona akambohwina mubairo weSoccer Star of the Year mugore ra2022 apo aitambira FC Platinum.

Kutora kwaakaita mubairo uyu zvekare gore rino, kwabva kwamuona achiita nhorondo yekuve mumwe wevatambi vashoma vahwina mubairo uyu vachitambira zvikwata zvakasiyana.