mbulelo smpofu
Bhekimpilo Tshalibe
INGCITSHI kwezokulima sezixwayise abalimi ukuthi kulesi isigaba sokulima kabaqhubeke behlanyela umumbu njengoba izulu lisasekhona.
UMnumzana Bhekilizwe Ncube onguDeputy Director we- Department of Agricultural and Rural Development Advisory Service (Ardas) esabelweni seMatabeleland South ukhuthaze abalimi ukuthi baqhubeke behlanyela umumbu njengoba izulu lisesekhona.
Uthe njengoba sesithole izulu ngemva kwesikhathi eside ukhuthaza abalimi ukuthi beqhubeke behlanyela.
“Njengoba izulu lisasekhona sikhuthaza abalimi ukuthi baqhubeke behlanyela umumbu kuze kuyefika umhlaka 15 Nhlolanja. Ngemva kwalokhu sikhangelele ukuthi abalimi beqalise ukulima izilimo ezinjengabo-sugar beans lama-fodder crops agoqela o-lab lab labo-velvet beans,” kutsho uMnu Ncube.
Uqhubekele phambili wathi ukhuthaza abalimi ukuthi behlanyele inhlanyelo eziphangisa ukuvuthwa.
“Sikhuthaza abalimi ukuthi bahlanyele inhlanyelo ephangisa ukuvuthwa ngoba isikhathi sezulu sandise ukuphela ekupheleni kukaNhlolanja ngakho sikhangelele ukuthi konke okulinywa khathesi kungadluli leso sikhathi kube sekuvuthiwe,” kutsho uMnu Ncube.
Uthe ngobunengi bezulu kulezilimo eseziphakamile sikhuthaza abalimi ukuthi benze i-top dressing.
“Kulezilimo eseziphakeme sikhuthaza abalimi ukuthi bafake i-top dressing kumbe bafake umquba ole-nitrogen enengi njengabo-urea le-Ammonium Nitrate ukwenzela ukuthi izilimo zikhule masinya,” kutsho uMnu Ncube.
Uthe ukhuthaza abalimi ukuthi bengakhohlwa ukuthi isizini yethu yezulu iyafanana laleyi eyayikhona kudala.
“Sikhuthaza abalimi ukuthi bengakhohlwa ukuthi isizini yethu yezulu iyafana laleyi eyayikhona kudala njalo isihamba incipha. Sikhuthaza futhi abalimi ukuthi behlanyele bekhangele ukuthi umumo womkhathi usutshintshile, ngokunjalo sokumele kuhlanyelwe izilimo ezivuthwa kungakedluli amalanga angu-60 alandelayo,” kuphetha uMnu Ncube.
shloboe boe
