shloboe boe
Bhekimpilo Tshalibe
AMAPHOLISA asedolobheni lakoBulawayo adinga uThomas Tshuma oleminyaka engu-59 yokuzalwa ohlala eCowdray Park koBulawayo ongabonakaliyo.
Kubikwa uTshuma wacina ukubonakala mhlaka 27 Mpalakazi ngo 2024, wasuka ngakibo esiyathenga idelele njalo kazange ephenduke.
UTshuma umfitshane njalo ulenwele ezimhlophe njalo umhlophe ngokombala. Ubuye aphile lomkhuhlane wengqondo.
Kuzwakale ukuthi uTshuma wacina ukubonakala egqoke i-T-shirt elombala oyi-grey le work suit elezikopela ezilombala oyi-blue kanye lezicathulo ezingafaniyo.
Intatheli ixhumane lesikhulumi samapholisa akoBulawayo uAssistant Inspector Nomalanga Msebele, uthe ucela ongaba lolwazi mayelana lalapho okuloTshuma abikele amapholisa.
“Ongaba lolwazi olungasiza ukuthi sithole umuntu lo ongabonakaliyo angathinta amapholisa eCowdray Park ku 0773711811 kumbe ku (0292)560029 kumbe aye emapholiseni aseduze laye,” kuphetha u-Asst Insp Msebele.
Kusenjalo amapholisa akoBulawayo adinga izihlobo zenye indoda eyatholakala izibophele esihlahleni esiseRichmond, koBulawayo mhlaka 1 Lwezi nyakenye.
Amapholisa aveze ukuthi umuyi yindoda engazakaliyo ukuthi ingubani njalo ileminyaka emingaki, njalo ilomzimba olingeneyo, imnyama ngokombala njalo ilempabanga. Indoda le yatholakala igqoke ibhatshi elimnyama, lesikipa esiyi maroon, lebhulugwe eliyi-navy kanye lamathenisi amnyama alentambo ezimhlophe.
Intatheli ixhumane lesikhulumi samapholisa akoBulawayo uAssistant Nomalanga Msebele, othe ukhuthaza uzulu ukuthi ehambe ethwele izithupha.
“Amapholisa akhuthaza uzulu ukuthi ehambe ethwele izithupha. Lokhu kuyanceda amapholisa nxa esenza uphenyo lokuthi izihlobo eziseleyo zithole ukuthula masinyane. Sicela amalunga omphakathi angabe edinga umuntu oyindoda ohambelana lalokhu okuqanjwe lapha ukuthi bethinte amapholisa eSauerstown ngo (0292)2226413 kumbe amapholisa aseduza laye.
