shloboe boe
Ethel Ncube
INDUNA yeTsholotsho idinga bonke abagangayo ezigabeni abagoqela ababophela amalembu lamaphenti ezihlahleni kunye labanye abenza imithanithani yabo ezindaweni ezitshiyeneyo ngoba kubikwa bengavalela izibusiso zesigaba kugoqela lezulu.
Induna uGampu uveze ukuba ngoLwesihlanu bazabe besedale kukhulunywa ngemithanithani eyenziwa ngabantu endaweni ezitshiyeneyo esigabeni.
Ekhuluma lentatheli induna uGampu uveze ukuba izakhamizi kumele ziveze bonke abonayo ukuze bajeziswe.
“Abantu bayesaba ukukhuluma izinto ezimbi ezenzakala esigabeni angazi ukuthi yindaba. Izinto lezi zilempumela engayisiyo khathesi kunje kwatholakala iqhiye igwazwe ngengqamu ezine phansi. Duze leqhiye le kulephenti lomuntu ongumama esihlahleni kulefulegi layo ihlatshwe ngegqamu ezintsha kukhona imithanithani ethile eyenziwayo.
“Omunye waba lesibindi wabuya wazokhuluma ngoba izulu lalisina lindawo isale ingelazulu lifefeze ledlule. Osobhuku bami bahamba bayakhupha iqhiye lephenti batshisa konke kwaqala ukuna kuhle izulu,” kubika induna.
Uqhubekele phambili eveza ukuba lesisenzo wakhuluma ngaso ekhuza abantu esigabeni.
“Ngathi ngisemfeni ngasukuma ngakhuza ukuba abantu abekele ukwenza izinto zokuganga ezivala izulu lokunye ngakhuza ngidinga ukuba okwenzileyo uzavela. Kwavela abanye sebesithi kimi sicela lisibizele omunye umfundisi enkundleni azasiphendula ngokuthi usebenza njani. Umfundisi lo kuthiwa kwenye indawo wakhupha isandla somuntu wasitshisa, wakhupha inhloko yenkomo engabolanga inkomo yakhona isileminyaka yabulawa. Umfundisi lo simbizela ukuba sizwisise indlela yokusebenza kwakhe ngoba abanye bathi uyathi uyelapha engelapha umuntu asale edlula emhlabeni.
Sifuna ukuba asichazele laye ngoba kukhanya kukhona laye okubi akwenzayo okungacina kuhlupha umphakathi kusasa,” kuphetha induna uGampu.
