mbulelo smpofu
Brandon Moyo
IQEMBU leMatabeleland Lions, eliseGwanda, lilakho ukuthi lehlise ukuzitshela kwamaqembu omdlalo we-rugby koBulawayo mhla zidibana kumqhudelwano weBulawayo Metropolitan Rugby Football Board (BMRFB) Under-20 mhlaka 25 Zibandlela, eHartfield Ground.
Amalungiselelo eligi okuyiyo evula isizini ye-rugby aqhubekela phambili njengoba amaqembu amahlanu akoBulawayo lelinye elivela eGwanda ebike ukuthi azadlala.
Intshantshu zanyakenye kulumncintiswano, i-Old Miltonians (OMs) izadibana leqembu leMatabeleland Warriors, Highlanders, Bulldogs, Panthers kunye leMatabeleland Lions esuka eGwanda kuligi ka2025.
Njengoba wonke amaqembu abesilisa eqinisekisa ngokuphatheka kumidlalo, kuhlandla labesifazane kulePanthers, iHighlanders leBulldogs kuphela.
Izikolo ezinxusiweyo kazikabiki ngesimo sazo, nanko izikolo zivulwe ngoLwesibili kuliviki.
Ekhuluma leZimpapers Sports Hub, umqondisi wemidlalo uGeorge Hlatshwayo uthe bakhangelele ukuthi izikolo ziqinisekise ukuphatheka kwazo ekupheleni kweviki.
“Amalungiselelo asesigabeni esiphambili, wonke amakilabhu akoBulawayo athe azadlala. Silinde izikolo ukuthi ziphendule, ikanti sikhangelele ukuthi zisitshele kusiyafika ngoLwesihlanu.
Amalungiselelo enkundla asesezingeni eliphezulu,” kutsho uHlatshwayo. Isigaba sokuqala semidlalo yeligi sizadlalelwa eHartsfield Rugby Grounds B Field njengoba inkundla enkulu ilungiswa.
UHlatshwayo uthe balindele umqhudelwano omkhulu lapho wonke amaqembu ezatshengisa umdlalo wawo waphezulu. Uqhubeke wathi iligi le ibaluleke kakhulu ekusizeni amaqembu ezikolo ukuthi alungiselele isizini ezayo. Ngaphezu kwalokho, iyinkundla yokuthi abadlali abasakhulayo laba bakhethwe kuqembu lelizwe, ama-Junior Sables.
“Umqhudelwano lo uzasetshenziswa njengenkundla yabadlali abaleminyaka yokuzalwa engaphansi kwe-20 ukutshengisa amathalenta abo lokuthi babonwe ngabaqeqetshi, bakhethwe kumaqembu esizwe. Sithemba ukunxusa kwethu abaqeqeshi beqembu le-Junior Sables kuzanceda abafana bethu.
“Iligi le izaphinda isetshenziswe yizikolo ekulungiseleleni ikhalenda abantwana besikolo ukuzama inhlanganisela ifomu entsha emaqenjini. Eminyakeni embalwa edluleyo izikolo ebezikulolu phiko ziqhubeke ngokwenza kuhle ngesikhathi sekhalenda yezikolo,” kutsho uHlatshwayo.
Izikolo ezinxusiweyo yiChristian Brothers College (CBC) Hornets, Milton Elephants, Petra Spartans, Gifford Stingers leFounders High School.
Ngemva kokuphothulwa kweligi yama-Under-20, i-Archer Clothing Rugby League kulindeleke ukuthi iqalise.
shloboe boe
