Siphakeme .Mnindwa
Bhekimpilo Tshalibe
INGCITSHI kwezokulima sezixwayise abalimi ukuthi kulesisigaba sokulima belime i-ginger ngoba ilenzuzo emangalisayo.
UMnumzana Mduduzi Dube ongu-Agronomist kunkampani ye-AgriSeeds uthe abalimi kumele bazame ukulima i-ginger ngoba ilenzuzo emangalisayo. Uthe i-ginger yenza kuhle ngesikhathi sokutshisa.
“I-ginger yenza kuhle ngesikhathi sokutshisa njalo sikhuthaza abalimi ukuthi bayilime endaweni elomumo womkhathi odlalela phakathi kuka 18-27 degrees Celsius. Okunye njalo i-ginger ivuma kuma-well drained medium loomy soils ale p.h engange 6.0 kusiya ku-6.5 njalo kayifuni ndawo elamanzi kakhulu,” kutsho uMnu Dube.
Uqhubekele phambili esithi inhlanyelo ye-ginger zimpande (rhizomes).
“Inhlanyelo ye-ginger zimpande njalo sikhuthaza abalimi ukuthi baqale bezomise bengakazihlanyeli njalo bazifake kuma-tray bengakazihlanyeli njalo zingahluma besebezihlanyela emasimini abo. Okunye njalo nxa sebehlanyela abalimi sibakhuthaza ukuthi bavule imizila njalo bavule izikhala phakathi ezingabayi 15 kusiya ku-30cm,” kutsho uMnu Dube.
Uthe ukhuthaza abalimi ukuthi bakhiphe ukhula emasimi ukwenzela ukuthi lungaphambanisi ukumila kwezilimo.
“Sikhuthaza abalimi ukuthi bakhiphe ukhula besebenzisa ikhuba ngemva kwamaviki angu-6 kusiya ku-8 behlanyelile njalo bekhiphe ngonanzelelo ukwenzela ukuthi bengaphambanisi impande zabo,” kutsho uMnu Dube.
Uthe i-ginger ilezibungu ezinlutshwane njalo ukhuthaza abalimi ukuthi befafaze izilimo zabo ukuze bebulale izibungu.
“I-ginger ihlaselwa yizibungu ezigoqela o-shoot borer, leaf roller kanye le-scales njalo sikhuthaza abalimi ukuthi befafaze izilimo zabo besebenzisa umuthi okuthiwa yi-malathion kanye le demethiote ukuze babulale izibungu,” kuphetha uMnu Dube.
